Euskal Herriko hondartzak aldarrikapenez bustiko dira
Domekan [abuztuak 6] Euskal Herriko hondartzetara joateko deia zabaldu du Etxerat elkarteak, "Etxera!" leloagaz.
2022ko hondartzetako martxa, Lekeition. Bizkaiko, Gipuzkoako eta Lapurdiko hamabost hondartzatan egingo dituzte mobilizazioak domekan [abuztuak 6], eta tartean, Ondarroan, Lekeition eta Mutrikun ere bai, 12:00etan. Ondarroan Alamedan, Mutrikun danborrean eta Lekeition Abadeen Moilan izango dira elkarretaratzeak, euskal preso, iheslari eta deportatu politikoek gaur egun jasaten dituzten euskubide urraketarekin amaitzeko aldarria eginez, eta “oraindik bizi duten egoeraz ohartarazteko”.
Adierazi dute dispertsioa eta urruntze politikarik barik egoera “hobea” dela, baina hala ere eskubideen urraketa ez dela amaitu, “etxerako bidea oztopatzen duten salbuespen neurriak eta eskubide urraketak arau direlako oraindik”. 156 preso, hamazazpi erbesteratu eta bost deportatu politikoak etxera itzuli behar direla azpimarratu dute elkarteko kideek. Horietatik 90ek haien zigorraren erdia bete dute, eta ondorioz, hirugarren gradua egokitzen zaie, baina hogei bakarrik daude hirugarren graduan. Bestalde, hamairu preso hirugarren graduan egon dira denbora batez, baina Auzitegi Nazionalak berriro ere bigarren gradura itzuli behar direla erabaki du. Gaineratu dute, gaur egun Espainian dauden 45 presori ez dietela Frantziako espetxeetan pasa duten denbora zenbatu. Beste hainbat aldarrikapen eta arrazoiren artean, preso, erbesteratu eta deportatu guzti hauek “etxean eta bizirik” nahi dituztela adierazteko elkartuko dira euskal hondartzetan.
Horrez gain, Etxerat elkartekoek Sarek abuztuan presoen eskubideen alde deitu dituen mobilizazioetan parte hartzera deitu ditu herritarrak.
