Umeek ere haien eguna izan dute Lekeitioko San Antolin Jaietan
Gaur [irailak 6] Umeen Eguna da herrian, eta gogotik ospatzen ari dira askotariko ekintzekin.
Lekeitioko San Antolin Jaiak denentzako jaiak dira, denek dituzte gozatzeko ekintza edo egunen bat, adin edota gustu guztietarako ekimenak daude. Gaur [irailak 6], adibidez, Umeen Eguna da. Hain zuzen ere, haiek dira gaur Lekeition ajerik ez duten gutxienekoak atzoko [irailak 5] Antzar Jaiaren ostean.
Gaua luzea izan da, baina baita goiza ere. Herriko txikienek askotariko ekintzak izan dituzte aukeran. Zelan ez, beste urte batez, umeen masta-puntakoak ume asko erakarri dute. 47 umek eman dute izena abadeen moilan, hau da, iaz baino 3 umek gehiagok. Hiru mailatan banatu dituzte ikurrinak hartzeko: 2012 eta 2013 urteetan jaiotakoak, 2010 eta 2011n jaiotakoak eta 2009an eta 2008an jaiotakoak. Denen artean abilenak Ibon Balenziaga eta Nabar Goitia izan dira.
IKUSI ARGAZKI GALERIA ZUZENEAN
Busti nahi ez zutenek, azkenean gutxi batzuek bakarrik hartzen dituztelako ikurrinak, herriko plazan elkartu dira. Bertan, umeek askotariko ekintzak izan dituzte: puzgarriak, barrakak edota jolasak. Ilara luzeak sortu dira, batez ere barraketan.
Arratsaldean erraldoiak izan dira protagonistak Lekeitioko eta Markina-Xemeingo konpartsek bat egin baitute kalejiran Parkeko Gunetik hasita eta plazara arte. Gauean, Antzar Jaiko sari banaketa egingo dute eta su artizialak jaurtiko dituzte 23:00etan.
