Bost ekimen dakartza Berriatuko Literatur Asteak
Martitzenean [urriak 17] hasi eta barikura [urriak 20] bitartean bost literatur ekintza egongo dira aukeran, ume zein nagusientzat.
Berritxu Danok Einaz elkarteak Berriatuko Udalagaz elkarlanean antolatutako Literatur Asteak bost ekimen dakartza urriaren 17tik 20ra bitartean eta haur zein helduei bideratutako saioak uztartuko dituzte, denak ala denak, erdigunean literatura izango dituztelarik.
Martitzenean ekingo diote ekimenei eta Mireia Delgado ipuin kontalariak bi saio eskainiko ditu. Narrazioa, poesia, asmakizunak eta antzerki apur bat uztartuko dituen Hitzak josten saioa haur eta helduei bideratuta egongo da. “Ipuinetako hitzak tximeleten berezko hegaldiaren erritmora datoz gugana. Hitz batzuk, kili-kili egin eta etorri diren bezala alde egiten dute. Badira ordea, kili-kili egin eta barruraino sartzen zaizkigun hitzak”. Bigarren saioa, berriz, helduei zuzendutako ikuspegi feminista duen Hariak, jostorratzak eta zauriak narrazioa izango da. “Lotzen gaituzten hariak ikusezinak omen dira eta, batzuetan, zaila da haien neurria hartzea… Zein da hari horiek mantentzeko tentsio egokia? Zenbat tiratu eta zenbat askatu?”.
Eguaztenean [urriak 18] irakurketa klubak antolatutako saioaren txanda izango da, zehazki, Amets Arzallus Antiaren Miñan liburua landuko dute, idazleagaz batera. Eguenean, berriz, Perli eta Koxkoloren ikuskizunean musika eta dantza uztartuko dira eta gozamenerako hitzordua izango da: “Bidaia liluragarri bat egitera eramango zaituztegu. Musika eta dantzaren laguntzaz, toki zoragarriak eta lagun bitxiak aurkituko dituzue munduan zehar, eta ilargira ere iritsiko zarete”.
Ekimenez jositako astea borobiltzeko asmoz, Maria Luisa Arrietaren Mi transformacion liburuaren aurkezpena egingo dute Saioa Lopezen laguntzagaz.
EGITARAUA
- Urriak 17 [martitzena]. Hitzak josten haur eta helduentzat, 17:00etan, liburutegian. Hariak, josorratzak eta zauriak Mireia Delgadoren saioa helduentzat, 19:00etan, bideo gelan.
- Urriak 18 [eguaztena]. Miñan, irakurketa kluba Amets Arzallusekin, 19:00etan, liburutegian.
- Urriak 19 [eguena]. Perli eta Koxkolo, 17:00etan, bideo gelan.
- Urriak 20 [barikua]. Maria Luisa Arrietaren Mi transformacion liburuaren aurkezpena, Saioa Lopezekin, 19:00etan, bideo gelan.
