Txikia IV.aren erakustaldia: urrezko aizkora, urrezko saioa eginda
Julen Alberdi ‘Txikia IV.a’-k irabazi du Urrezko Aizkolari Txapeldunen Ligako finala. Igoin pikabea izan da gazteen artean bizkorrena. Harri jasotzaileen erakustaldiak ikusleen arreta jaso du.
Alberdi, txapela jantzita. Urrezko aizkorak Azkoitiarako bidea hartu du: Txikia IV.a ezizenez ezaguna den Julen Alberdik irabazi du Urrezko Aizkolari Txapeldunen Ligako finala. Etxebarriak hartu zuen, atzo, lehiaketako azken hitzordua. Jendetza elkartu zen 12:00etan Txutxo pilotalekuko harmailetan, goi mailako aizkolaritzaz gozatzeko.
ARGAZKIAK
Lau aizkorari aritu ziren nor baino nor gehiago: Iker Vicente otsagabiarra –lehia hasi orduko, hautagai nagusia, askoren ahotan–, Mikel Larrañaga azpeitiarra, Hodei Ezpeleta Bihurri eibartarra eta Alberdi. Beraz, gipuzkoar edo nafar baten buruak jantziko zuen txapela. Egitekoei zegokienez, ez zituzten makalak eduki: kolpeka, erlojupean, zutik, abiadura saioan eta lan erdira aritu behar izan ziren.
Eguneko protagonista: Alberdi.
Binaka aritu ziren aizkolariak: Txikia IV.a eta Larrañaga, lehenengo; Vicente eta Ezpeleta, jarraian. Kolpekako eta erlojuaren kontrako saioetan, Vicentek bere legea ezarri zuen. Txikia IV.a-k, ostera, lehen ezustekoak zutik lehiatuz eta abiadura proban eman zituen, denbora onenak ezarriz. Larrañagak ezer gutxi egin ahal izan zuen aurkarien alboan, eta podiumeko lehiatik kanpo geratu behar izan zen.
Ezpeleta eta Vicente, lehia betean.
Azken proban, lan erdira, aizkolariek 60 ontzako lau enbor moztu behar izan zituzten. Lehen txandan Alberdik ia 11.58ko langa ezarri zuen, Larrañagak baino minutua gutxiago. Bigarren txandan, Vicenteren eta Ezpeletaren artean borroka egon zen, harmailak sutan ipini zituena. Sendo hasi zen Ezpeleta, baina, bigarren enborraren ondoren, saioa aldapa gora jarri zitzaion. Vicentek hobeto kudeatu zuen esfortzua, eta indartsuago ekin zien azken enbor biei. Azkenean, otsagabiarrak 12.13ko denbora lortu zuen; eibartarrak, ordea, 12.56koa.
16.11ko denbora egin du Alberdik
Buru egokira jo du txapelak. Jarduera guztietako denboren baturak erabaki zuen garailea, eta ez zen zalantzarik egon: Alberdik irabazi zituen txapela eta urrezko aizkora. 16.11ko denboragaz osatu zituen lanak; Vicente txapeldunordeak, 16.42koagaz; podiuma osatu zuen Bihurrik, 17.39koa egin zuen; azkenik, Larrañagak 18 minutu eta 29 segundo behar izan zituen.
Txapeldunak “alde txikiagoak” espero zituen: “Lehen hiru probak bizkorrak ziren; horietan aldeak egitea zaila zen. Azkenak, baina, beldur apur bat gehiago ematen zidan, ondo bainekien maila handiko aizkolariak nituela aurkari Dena dela, sasoi onean topatu naiz, eta azkenean minutu erdikoa atera diet”. Vicente egurraren ezaugarriez mintzatu zen: “Azken lau enborrak uste baino gogorragoak izan dira; harmailetatik uneoro entzun ditut nire denborak, eta pentsatu dut aukerekin egongo nintzela. Azkenean, Txikia IV.a koska bat gorago agertu da, eta merezitako garaipena lortu du”.
Igoin Pikabeak irabazi du gazte mailako lehiaketa
Urrezko aizkoragatik lehiatu zutenak ez ziren eguneko izar bakarrak izan: gazte mailako lehiaketa ere egon zen. Isidro Velasco, Igoin Pikabea eta Unai Etxeberria Osinalde aritu ziren lehian, eta bizkorrena bigarrena izan zen; 10.06ko denboran ebaki zituen 54 ontzako lau enborrak. Harri jasotzaileen erakustaldi mistoa ere egon zen. Ainitze Zumeta, Paulo Azpiazu, Maddi Gesalaga eta Beñat Telleria izan ziren protagonistak.
