Arakistain eta Lizardi nagusitu dira Mutrikuko Elite Txapelketan
Barikuan [urriak 27] bi setetan hartu zituzten mendean Mugartegi-Lejardi bikote markina-xemeindarra. "Txapelketako partidarik onena izan zen, laurak maila oso altuan aritu ziren. Aspaldiko partidarik onena", adierazi dute antolatzaileek.
Arakistain eta Lizardi txapelagaz. Argazkia Danok Bat Pelota Elkartea Lau puntistarik onenak heldu ziren Mutrikuko Elite Txapelketako finalera, eta laurek partida “izugarria” eskaini zieten Muruaitz frontoira bertaratu ziren ikusleei: “Txapelketako partidarik onena izan zen, laurak maila oso altuan aritu ziren. Aspaldiko partidarik onena”. Lehia berdindua izan zen, tanto eder askokoa eta hutsegite gutxikoa. Emakumezkoen zesta-puntak ere goranzko bidea hartu du, iaz Berriatuan jokatu zuten lehen aldiz Elite Txapelketa, eta bigarrena ere “arrakastatsua” izan da.
Ihart Arakistain eta Eneritz Lizardi ligaxkako bigarren aurrelari eta atzelari onenak izan ziren. Aurrean hain ondo elkar ulertzen duten Erika Mugartegi eta Arai Lejardi markina-xemeindarrak zituzten. Mutrikuarra eta sopeloztarra ideia argiekin kantxaratu ziren, pilota erreboteraino atzeratu nahi zuten. Bete-betean asmatu zuten, Mugartegik arazoak izan zituen jokaldi horregaz, min handia egin zuten. Gainera, Arakistainek aurkariak baino gehiago eta hobeto amaitu zituen tantoak aurreko koadroetan. 9-15 irabazi zuten lehen seta, nagusitasunez.
Finaleko talde argazkia. Argazkia: Danok Bat Pelotazale Elkartea.
Bigarrena lehiatuagoa izan zen. Lejardi eta Lizardi nor baino nor gehiago aritu ziren atzeko koadroetan, biak maila handian, pilota gatz asko sartuz eta oparirik egin gabe. Urdinen akatsekin 9-7 aurreratu ziren markina-xemeindarrak. Aldea, berriz, aurrean zegoen, Arakistainek min gehiago egiten zuen. 13-13 berdindu zuten eta hutsegite gutxiago eginez jantzi zuten txapela: 13-15. Hirugarren Maite Ortiz de Mendibil eta Maialen Aldazabal geratu ziren eta laugarren Naroa Merino eta Frida Watkins.
