'Loak ezkutatzen duena' da 2023ko Zubikarai bekatik ateratako lana
2022ko Augustin Zubikarai nobela beka irabazi zuen Patxi Zubizarretaren proiektuak. Gaur [azaroak 2] egin dute aurkezpena Elkar argitaletxean.
Nerea Lorenzo Euskara zinegotzia, Patxi Zubizarreta idazlea eta Urtza Alkorta Ondarroako alkatea. Iturria: Elkar 2022ko Ondarroako Augustin Zubikarai beka sariko irabazle Patxi Zubizarreta idazlearen ‘Loak ezkutatzen duena’ liburuaren aurkezpen ekitaldia egin dute gaur [azaroak 2] Elkar argitaletxearen bulegoan. Xabier Mendiguren Elkarreko editorearen hitzetan “nobela harrigarria” da, kontatzen duenagatik zein kontatzeko duen moduagatik. Kontakizunak irakurlearekin jolas egiten du eta ustekabez-ustekabe amaierara eramanez, irakurlearentzako “plazer iturri amaiezina da”.
Espainiako Haur eta Gazte Literatura saria eta Euskadi Saria irabazi berri dituen Zubizarreta idazleak esker hitzak eskaini dizkio Ondarroako Udalari, “beka aukera oso interesgarria baita idazle profesionalentzat “.
Abiapuntutik haratago detektibe-nobela bat bihurtzen da kontakizuna
Eleberriak lo eza du lan ildo nagusi eta autoreak “pandemia berria” bezala definitzen duen insomnioa lantzen du. Insomnioari buruzko erreportaje bat balitz bezala hasten da kontakizuna: “Loa ez da ikertua izan, lo eza aldiz negozio bide bilakatu da, baina pandemia berria dugu insomnioarena. Misterioarekin lotzen da lo gabe nola deskonektatzen dugun bizitzatik. Berdina gertatzen da liburu batean sartzen garenean, ahaztu egiten zaigu inguruan gertatzen dena”.
Kontakizunaren eta idazlearen ezaugarri bereizgarria da erreferenteak eta hitz jokoak erabiltzea, eta hain zuzen ere, horrela azaltzen du autoreak nobelaren abiapuntua: “Presoaren askatasuna, pobrearen aberastasuna, eta pobrearen eta aberatsaren arteko desberdintasunik egiten ez duen epaile zuhurra, hori da loak egiten duena, eta misterio horren inguruan hasten da nobela”.
Abiapuntutik haratago detektibe-nobela bat bihurtzen da kontakizuna, bere misterio, jazarpen eta guzti, zehazki, gure gizartearen diagnostiko gordina egiteko. Nobela aurkeztuko dute Ondarroan, gaur [azaroak 2], 18:00etan Kofradia Zaharrean. Ostean, Nanoipuin lehiaketako irabazleen sari banaketa ekimenari ekingo diote.
