Ereindako haziek loratzen jarraitzen dute Berriatuan
Erroak Loran jaiak jende asko batu du gaur [azaroak 25] Berriatuan. Azokak hartu du plaza goizean, bazkariak frontoia eguerdian eta erromeria doinuek plazako karpa arratsaldetik aurrera. Zapi morez bete da ospakizun eremua, indarkeriaren amaiera eskatzeko.
Frontoi bete jende batu da Erroak Loran jaiko bazkarian Eguraldi goibelari irribarrea jarrita ari dira ospatzen Berriatuan Erroak Loran jaia. Gaur [azaroak 25] 10:00etan zabaldu dute elikagaien, artisauen eta animalien azoka plazan, eta halakoetan gertatu ohi den modura, eguerdian pilatu da jenderik gehien. Salmentetan denetarik egon da. Batzuek nahikoa saldu dute, beste batzuek ez bainbeste, baina denek ala denek azpimarratu dute azoken garrantzia, eta herritarrak bertoko produktuak kontsumitzen segitzera animatu dituzte.
Gazta, eztia, baserri eta arrain kontserbak, gozoak, bitxiak, poltsak, saskiak… Ezin beteago egon da Berriatuko plaza 14:30ak arte, 11 artisauren eta hamazazpi ekoizleren postuekin. Eta inguruan, animaliak: behiak, idiak, kontxintxinak, oilarrak, zaldiak eta poniak, esaterako. Ez horiek bakarrik: zortzi artalde eta hiru ahuntz talde ere egongo dira ikusgai.
Ikasbidairako postua ere jarri dute eskolako gazteek, tortilla pintxo eta bizkotxoagaz eta Hostozabal Basogintza Elkarteak taloak prestatu eta saldu ditu, herriko osagaiekin egindako taloak. Gelditu barik egon dira lanean, eta pozik zeuden jendeak emandako erantzunagaz. Hirugihar, txorizo eta txokolazteko taloak eskaini dituzte, eta guztiak saldu dira. 260 txorizo talo, 100 hirugihar talo eta beste 100 bat txokolatezkoak. “Oso pozik gaude. Elkartearen berri emateko asmoz etorri gara, baina ezin izan dugu egin, jende asko asko ibili da eta”, azaldu du Urko Galdos elkarteko idazkariak. “Pentsatzen genuen txosnan lanera jende asko etorriz gero, azoka ikustera helduko ginela, txandaka, baina ez dugu lortu, egon den jendetzagaz. Ea datorren urtean”, zioen, irribarretsu.
13:00etan, indarkeriari ezezko borobila emateko batu dira kioskoaren bueltan. Talde argazki erraldoia atera dute, eta Euskal Herriko Mugimendu Feministaren mezua zabaldu dute. Nahikoa dela adierazi dute, indarkeria amaitu egin behar dela berandu baino lehen. Zapi moreek hartu dute ospakizun eremua, indarkeriaz amaitzeko eskatzeko.
Frontoi bete jende. Mendibarrenen izan dute hitzordua ondoren. 14:30ean hasi dira umeak bazkaltzen eta ordu erdi beranduako nagusiak. Frontoi bete jende batu da, lagun eta familia giro ederrean. Eta eguna borobiltzeko, Trikizio taldearen erromeriak girotu ditu arratsaldea eta gaua.
Bihar ere [azaroak 26] egongo da ondo pasatzeko tarterik. Hondamendia antzezlanak emango dio amaiera aurtengo Erroak Loran jaiari. Frontoian ikusi ahalko da, 19:00etatik aurrera.
