Zabalik dago Markina-Xemeingo IV. Trikitixa Txapelketako izen ematea
Urtarrilaren 5era arte eman ahalko da izena. Baserri Egunean jokatuko dute txapelketa, maiatzaren 11n.
Bi urteko itxaronaldiaren ostean, badator beste behin ere Markina-Xemeingo IV. Trikitixa Txapelketa. Baserri Eguneko egitarauarren baitan ospatuko da txapelketa, maiatzaren 11n.
Gaur [abenduak 5] zabaldu dute izen ematea, eta urtarrilaren 5era arte zabalik egongo da. Parte hartu nahi dutenek mxtrikititxapelketa@gmail.com helbidera idatzi beharko dute, izen-abizenak, jaiotze data, herria eta kontakturako telefono zenbaki bat zehaztuz.
Orain arte 22 urtetik gorako txapelketa izan den arren, aurtengoan trikitilari gazteenak 18 urte beteta eduki beharko ditu, edo gehienez ere 2024. urtean bete beharko ditu. Horrez gain, trikitilari eta pandero jotzaile batez osatutako bikotea izan beharko da.
Parte hartuko duen bikote bakoitzak lau pieza jo beharko ditu. Trikitiaren, porrusaldaren eta arin-arinaren aukeraketa musikarien esku egongo da, baina jo beharko duten fandangoa epaimahaiak proposatutakoa izango da.
Sari potoloak egongo dira jokoan. Bikote txapeldunak 1.000 euro eta txapelak eskuratuko ditu. Bigarren onenek berriz, 700 euro eta oroigarriak, eta hirugarrenek 600 euro eta oroigarriak. Laugarren bikoteak 300 euroko saria eskuratuko du, eta ondorengoek, 250 euroko dieta jasoko dute.
Sariak eskuratzeko, epaimahaiak haibat puntu baloratuko ditu: zailtasuna (hauspoaren teknika eta digitazioa), piezaren ejekuzioa eta zentzua, erritmoa eta kantua. Azkenik, pandero-jotzailearen lana ere baloratuko dute, piezarekiko duen lotura kontuan hartuz.
Oharra. Antolatzaileek izen ematea itxi ostean erabakiko dute txapelketaren formatu zehatza, parte hartzaile kopuruaren arabera.
