100 argazki egongo dira ikusgai Mendexako argazki zaharren erakusketan
Erakusketa hiru egunez egongo da ikusgai: abenduaren 25 ean, abenduaren 31n eta urtarrilaren 1ean. Horrez gain, abenduaren 25ean Mendexako Udalaren egutegi lehiaketako sari banaketa ekitaldia egingo da.
Lagun artean gaiaren inguruko argazkien plaza izango da aurtengo Mendexako Gabonetako argazki zaharren erakusketa, zehazki, aisialdian oinarritutako 100 argazki egongo dira ikusgai . Leixarra Ondarea Babesteko Elkartearen kideek zehaztu dutenez argazki bilduma polita eskainiko dute: “Argazki bilketa egin dugu azken hilabeteetan eta herritarren aldetik erantzun ona jaso dugu. Erakutsiko ditugun beste argazki batzuk jada gure argazki artxiboan genituen argazkiak dira. Bilketa eginda eta aukeraketa bideratuta, 100 argazki inguruk osatuko dute erakusketa”.
Ohi legez argazki gehienak 80. hamarkadarainokoak dira, baina “badago baten bat bereziagoa eta berriago dena”. Hala ere, gauza bat ziurtatu dute, berritasuna ekarriko du erakusketak: “Orain arte gutxi ikusitako argazkiak izango dira”.
Erakusketa hiru egunez egongo da ikusgai: abenduaren 25 ean, abenduaren 31n eta urtarrilaren 1ean. Hiru egunetan ordutegi berdina mantenduko dute, 12:00etatik 14:00etara, udaletxeko ganbaran.
Horrez gain, abenduaren 25ean Mendexako Udalak antolatutako egutegi lehiaketan parte hartu duten argazkiak ere ikusgai egongo dira. 17 partaidek 26 argazki aurkeztu dituzte Mendexako baserri mundua gai izan duen lehiaketara. Ohi legez, sari banaketa ekitaldiari helduko diote 13:00etan. Aurtengo saridunak honakoak izan dira:
- Lehenengo saria Jose Ramon Txopitearen Hamen postria.
- Bigarren saria David Muruagaren Lurra goldatzen.
- Hirugarren saria Eneko Muruagaren Txipitxiaz indiarra joten.
