100 lagunetik gora elkartu dira Ziortza-Bolibarko desanexioaren XIX. urterrenean
II. Bertso Paper lehiaketako irabazleak Malen Ibarzabal eta Nerea Foruria izan dira. Esti Meseguerrek irabazi du emakumezkoen zaku eramate finala.
Argazkia: Ziortza-Bolibarko Udala. Egurialdiak lagundu zien atzo [abenduak 10] ziortza-bolibartarrei, desanexioaren XIX. urteurrenaren ospakizunean. Desanexioaren ospakizunagaz batera, udaletxe berria ere estreinatu zuen Ziortza-Bolibarko Udalak: “Eguna oso ondo joan zen. Herritarren erantzunarekin pozik gaude, jende asko etorri zen bai udaletxearen inauguraziora eta baita eguneko gainontzeko ekintzetara ere. Gainera, eguraldiaren laguntzagaz, herri kirolak kanpoan egin ahal izan genituen”.
Pixkanaka herritarrak elkartuz joan ziren herriko plazan, eta udaletxean egindako lanen bisitagaz hasterako, 100 lagunetik gora elkartu ziren. Aurreskuagaz hasi, eta udaletxeko osoko bilkurako aretoa izan zen lehenengo geldigunea: “Beheko solairua nola antolatu dugun azaldu genuen, eta ostean bigarren solairura igo ginen”. Bigarren solairuan lanei buruzko zehaztasun gehiago eman zituzten: “Lanak kronologikoki nola joan ziren azaldu genuen, zer nolako gorabeherak eta oztopoak eduki ditugun, eta amaitzeko, aurrekontuari buruzko datuak ere eman genituen”.
Izan ere, udaletxe berria inauguratzeko bidea ez da erraza izan. 2015 inguruan hasi ziren proiektu hau aurrera atera nahian, baina 2021era arte ezin izan ziren lanekin hasi. Urte horretan, aurrekontua heren bat igo ondoren, Zamakona S.A. enpresak eskuratu zuen lana egiteko ardura: “Euskal Energiaren Erakundeari diru laguntza eskatu genion, baina ukatu egin ziguten. Hala ere, lanak aurrera zihoazela, Madrileko Gobernuak 390.340 euroko diru laguntza onartu zuen”. Beraz, 752.757 euroko aurrekontuaren %52a diruz lagunduta, aurtengo maiatzean amaitu zituzten lanak. Aurrera egiteko “energia eta indar handia” eskatu duen proiektua izan den arren, “helburua beteta” amaitu dituzte lanak: “Herriko plazaren erdian dago udaletxea eta gainera, taberna berri bategaz”.
Argazkia: Ziortza-Bolibarko Udala.
Zehaztapen guztiak eman ostean, Nerea Ibarzabal bertsolariak lau bertso abestu zituen, udaletxeko lanen inguruan. Ondoren, II. Bertso Paper Lehiaketako sari banaketa egin zuten. 16 urtez azpikoen artean Malen Ibarzabal izan zen onena, eta nagusietan berriz, Nerea Foruriak irabazi zuen. Errigorako saski bana eskuratuta, ekitaldiagaz amaitzeko Nerea Ibarzabalek abestu zituen irabazle bien bertsoak. Ostean, denak arkupean elkartu, eta kopaua egin zuten.
Meseguer, garaile. Udaletxe berriaren inagurazioaren ostean, herri kirolak izan ziren protagonista. Nerea Sanz, Esti Meseguer eta Amaia Mendinueta norgehiagoka aritu ziren, Emakumezkoen Bizkaia Openeko zaku eramate finalean. 40 kiloko zakua eramaten azkarrena Meseguer izan zen: 32 segundo inguru behar izan zituen lanak amaitzeko. 34 segundo ingurugaz, Sanz izan zen bigarrena eta 36 segundogaz, Mendinueta sailkatu zen hirugarren. Ostean, tentsioa lasaitu, eta herri kirol erakustaldia eskaini zuten hainbat kirolarik. Trontzan, lasto jasotzen, ingude jasotzen eta harri jasotzen aritu ziren kirolariak, eta herritarrek goi-goitik amaitu zuten egunagaz.
