Ondarroako kiroldegian hobekuntza lanak abiatu dituzte
Sarrera nagusia irisgarri bihurtzea, gimnasioko makineria berritzea eta larrialdietarako beste irteera bat zabaltzea izango dira landuko diren hiru puntuak.
Ondarroako Udalak kiroldegiko zerbitzua hobetzeko asmoz hobekuntza lanak abiatu ditu, zehazki, hiru puntu izango dira landuko direnak: sarrera nagusia irisgarri bihurtzea, gimnasioko makineria berritzea eta larrialdietarako beste irteera bat zabaltzea. 92. 727, 65 euro bideratuko ditu udalak zehaztutako lanak egiteko.
Ibon Bergara Etxearte kirol zinegotziak azpimarratu du kiroldegiak erreforma integrala behar duela, baina bitartean garrantzitsua dela zerbitzuen kalitatea bermatzeko lanak egiten jarraitzea: “Kirola osasuna da eta zorionez erabiltzaile asko ditu Zaldupe udal kiroldegiak”.
Kiroldegiko sarrera nagusia irisgarri bihurtzen eta aterpe bat egiten hasiko dira datozen asteetan, hain zuzen ere, gaur egun ateen astuntasuna kontuan izanda, ez baita irisgarria. Gainera sarrerak aterperik ez dauka, hortaz, sartu irteeretan nahitaez bustitzen dira erabiltzaileak. Bizpahiru astez egongo dira lanak egiten eta 21.412 euroko aurrekontua izango du obrak.
Kiroldegiko erabiltzaileen gorakada nabarmena eman da azken urteetan.
Bestalde, urte hasieran kiroldegiko gazte talde batek bultzatutako ekimenaren bitartez, kiroldegiko gimnasioko makineria hobetzeko asmoz elkarlanean hasi ziren udalagaz. Elkarlanaren ondorioz, 30.415,65 euro bideratuko dira gimnasioko makineria berritzeko; entrenamendu funtzionalerako eta indarrerako materiala berrituko dute, batik bat.
Azkenik, datorren astean hasiko dira larrialdietarako irteera berri bat egiten kantxan, zehazki, boulderraren eta rokodromoaren arteko horman. Larrialdien aurrean kantxa ahalik eta arinen uzteko baliagarria izango da, zuzenean kalera izango baitu irteera. Horrez gain, kantxaren edukiera 720 lagunekoa izatera ailegatuko da aldaketagaz. 40.900 euroko aurrekontua izango du lanak.
Mugiment Kirol Txartela ere martxan dago Ondarroan.
Kiroldegiko erabiltzaileen hazkunde nabarmena eman da azken urteetan, gimnasioaren lekualdatzeak lagunduta, eta kiroldegiko arduradunak pozik agertu dira erabiltzaileen aldetik jasotako erantzunagaz. Erabiltzaileen profila anitza dela zehaztu dute, gimnasioa egun osoan beteta egoten dela zehaztuz. Gainera, iaztik Mugiment Kirol Txartela ere martxan dago Ondarroan; zerbitzu horri esker Zaldupeko abonudunek beste herri batzuetako kiroldegietako zerbitzuak erabiltzeko aukera daukate, baita beste kiroldegietako abonatuek Zaldupeko zerbitzuak erabiltzeko aukera ere
