Hondakinak gero eta gutxiago bereizteko joera da Debabarrenako Mankomunitatearen kezka
2023ko datuek erakutsitako beheranzko joerari buelta emateko asmoz, Gaikako bilketa hobetzeko Plana martxan jarri dute. Datuen beherakada hondakin organikoetan nabarmendu da, batik bat, %5,35eko jaitsiera izan baitu.
Zigor Garcia Cimas enpresako ordezkaria eta Igor Aldalur Mankomunitateko ingurumen teknikaria. Argazkia: Mankomunitatea Debabarrenako Mankomunitateak 2023ko gaikako bilketaren balantzea egin du eta beheranzko joera nabarmena dela baieztatu dute: %2,13 jaitsi da gaikako bilketa eta edukiontzi grisetan utzitako hondakinak %0,67 hazi dira. Datu kezkagarriak hobetzeko, Gaikako bilketa hobetzeko Plana martxan jarri dute.
Datuek beheranzko joera argia erakusten dute, eta Mankomunitatetik “hobetu daitekeen urtea” dela eta “herritarrek hondakinak gero eta gutxiago bereizteko duten joera argia” agerian geratu dela azpimarratu dute. Debabarrenako gaikako bilketa tasa %53,58koa izan da aurten, iazko %54,28ko datuen aurrean. Datuen beherakada hondakin organikoetan nabarmendu da, batik bat, %5,35eko jaitsiera izan du, 4.712 tonatik 4.460 tonara igarota.
Horrez gain, hondakinen kalitateak ere behera egin duela argitu dute, “edukiontzi marroira botatzen diren hondakin desegokien ondorioz”. Urrian egindako azterketan aste betean 3.295 poltsa desegoki agertu ziren eta urte amaierako datuek azterketak ondorioztatutako joera baieztatu dute: pertsonako 64 kilo hondakin organiko biltzetik 61 kilo biltzera igaro da.
Paperaren eta kartoiaren bilketak ere %2,18ko beherakada izan du, zehazki, 3.862 tonatik 3.778 tonara igaroz. Aldiz, ontzi arinen eta beiraren bilketa mantendu egin da.
Mankomunitateak jasotako datuen aurreko kezka erakutsi du eta horren aurrean hainbat ekimen abiarazi ditu urtean, hala nola, herritarrak sentsibilizatzeko eta hondakinak bereizteko erraztasunak emateko ahaleginak egin ditu: kafe kapsulen bilketan hobekuntzak, Eibarko Garbigunean film industrialaren bilketa abian jartzea eta edukiontzi hori eta urdin berriak jartzea, tartean.
Egoerari buelta emateko asmoz, Gaikako bilketa hobetzeko Plana martxan jarri dute, “egungo datuak iraultzeko eta edukiontzietan gaizki bereizita uzten diren hondakinen kopurua murrizteko”. Cimas enpresarekin hasi dute proiektua abiarazteko lankidetza eta planaren helburua “bilketaren ehunekoa igoarazten duten aldaketak” ezartzea da.
Horrez gain, herritarren iritzia jasotzeko asmoz, inkestak eta azterketak egingo dituzte, “herritarren eta hondakinen sortzaileen zati handi batek jatorrian hondakinak zergatik ez dituen behar bezala bereizten argitzeko”. Azterketa egin ostean, hobekuntza proposamen bat egingo da egungo zerbitzuen hobekuntzei eta eskaini beharreko zerbitzu berriei dagokienez.
