Urresti, Mutriku Futbol Taldea, Burumendi eta Lete, Mutrikuko Kirol Galako Sarituak
Barikuan [abenduak 15] Zabiel kultur etxeko hitzaldi aretoan egin zen kirol ekitaldian lau sari banatu zituzten.
Hamaika urte daramatza Mutrikuko Udalak herriko kirolari zein taldeei merezitako omenaldia eskaintzen urte amaieran, eta aurten ere ez dute hutsik egin. Barikuan [abenduak 15] Zabiel kultur etxeko hitzaldi aretoan egin zen ekitaldian kirol munduan ibili diren eta dabiltzan herritarrei zein eragileei eskerrak eman eta errekonozimendua eskaini zitzaien.
Lau sari banatu ohi dituzte eta aurten Ane Urresti, Itziar Lete, Mutriku Futbol Taldea eta Burumendi Mendi Taldeko kideak izan dira sarituak.
Kirolari onenaren saria Ane Urresti Gandiagarentzat izan zen. Mutriku Sokatira Taldeko kirolariak herri kirolen munduan ibilbide aparta egiten ari den kirolaria. Azken lorpenen artean Lur Gaineko Munduko Sokatirako Txapelketan zilarrezko domina, 23 urtez azpiko 500 kilokoan eskuratu zuen Goiherri-Abadiño taldearekin lehiatuta.
Kirol talde onenaren saria Mutriku Futbol Taldeak jaso zuen. Iaz, emakumeen taldeak eskuratu zuen denboraldi bikaina borobildu ondoren, aurten, talde osoari egin diote aipamena. Saria jasotzen hurrengoak, ostera, Burumendi Mendizale Elkarteko historikoak izan ziren; Kirol ibilbide onena saria jaso zuten.
Azkenik, aipamen berezia Itziar Lete Andonegirentzat izan zen. Gipuzkoako Euskal Pilota Federazioko presidentea eta Danok Bat elkarteko kideak pilotaren munduan egiten ari den lanagatik jaso du errekonozimendua.
