"Maila oso ona" erakutsi dute puntistek Markina-Xemeingo Gabon Sarian
Hiru kategoriatan banatuta jokatu dituzte finalak. Emakumeen artean Helenak eta Araik irabazi dute. Gizonezko gazteen artean, berriz, Egigurenek eta Aratzek eta nagusietan, Arbek eta Manzik.
Markina-Xemeingo Zesta Punta Eskolak inguruko puntistak elkartu ditu aurtengoan ere Gabon Sarietan. Azaroaren 24an hasitako txapelketari herenegun [urtarrilak 6] eman zieten amaiera. Santi Olabe Markina-Xemeingo Zesta Punta Eskolako irakasleak eta Gabon Sarien antolatzaileak adierazi duenez, “jende asko” ibili da txapelketa guztian: “Pentsatzen genuena baino gehiago. Finalean ere, jenderik ez zen falta izan”.
Eguraldi txarra eginagatik, “giro oso ona” egon zen Uni frontoian: “Kanpoan ibiltzeko ez zegoen giro, baina, frontoirako egun aproposa izan zen. Jendearen erantzunarekin oso pozik geratu gara. Espektakulo politagaz, oso gustura amaitu dugu aurtengo Gabon Saria”.
Finaleko jokalari guztiak, Uni frontoian. Argazkia: Santi Olabe.
Hiru kategoriatan banatuta jokatu dituzte partidak: emakumeena, gizonezko gazteena eta gizonezko nagusiena. Emakumeen artean, Erikak eta Fridak jokatu zuten finala, Helena eta Arairen kontra. 15-13 eta 15-9, bi setak eta finala irabazita amaitu zuten txapelketa Helenak eta Araik.
Gizonezko gazteen artean berriz, Erkiaga eta Peru aritu ziren Egigurenen eta Aratzen kontra. Lehia estuan aritu ziren puntistak, eta tanto bakarraren aldeagaz, lehenengo seta Erkiagak eta Peruk irabazi zuten 15-14, eta bigarrena, berriz, Erkiagak eta Peruk, 14-15. Hirugarren setagaz erabaki zituzten txapeldunak, eta Egiguren eta Aratz nagusitu ziren, 5-1.
Egunagaz amaitzeko, gizonezkoen maila nagusiko finalak jokatu zituzten. Arbek eta Manzik jokatu zuten Antxon eta Bailoren aurka eta bi setak irabazita, Arbe eta Manzi nagusitu ziren. Lehenengo seta estua izan zen, 15-14 amaitu baitzuten; bigarrenean berriz, sei tantoren aldeagaz, 15-9 eskuratu zuten txapela.
Jokalari guztiek erakutsitako mailagaz pozik geratu dira antolatzaileak: “Maila oso ona erakutsi dute guztiek eta sorpresaren bat ere hartu genuen. Eskolak zerrendaburu jarri genituen Johan eta Zabala alde batetik, eta Erik eta Ibarluzea bestetik. Ikusi dugu txapelketako finalaurrekoak jokatu zituztenak kantxan zentratuago zeudela, eta hala, Arbe eta Manzi partida guztiak irabazita iritsi dira finalera”.
