Lea Artibai Ikastetxearen eta Basque Culinary Centerren arteko elkarlanak “aberasgarria” izaten jarraitzen du
Aspaldiko elkarlanaren ostean beste proiektu baten murgildu dira bi eragileak, eta biek ala biek “emaitza onak ikusita” harremana mantenduko dute.
Ikasleak pozik. Argazkia: Lea Artibai Ikastetxea Hain zuzen ere, urteak daramatzate Lea Artibai Ikastetxeak eta Basque Culinary Centerrek (BCC) elkarrekin lanean. Oraingoan, ikastetxeko Elikagaien Industriako Prozesuak eta Kalitatea prestakuntza zikloko bigarren mailako ikasleek BCC-ko Gastronomia eta Sukaldaritzako Arteen Graduko Elikagaien Garapena eta Teknologia espezializazioko laugarren mailako ikasleen proiektuetan parte hartzeko aukera izan dute.
Azaroan hasi ziren lanean BCC-ko ikasleek garatutako bost proiekturen aurkezpenagaz: Arrain analogoa, Gazta beganoa, Gozagarriak, Ogi-hondakinekin egindako garagardoa eta Olibondo hostoa esnekietan. Ikasle bakoitzak alor bat aukeratu zuen eta horren inguruko lanketa hasi zuen laborategi eta dastaketa gelan elikagaiak aztertzen eta analizatzen. “Helburua bost proiektuetan garatutako elikagaiei ikuspegi zientifikoa gehitzea izan da; hau da, balio erantsia ematea”, azaldu dute.
Horrela, ikasleek produktu berriak nola sortu ikasi dute, gastronomia eta aholkularitza teknologikoa uztartuz, ezagutzak partekatuz eta taldean lan eginez. Bi erakundeek adierazi dute esperientzia “oso atsegina eta aberasgarria” izan dela, eta horrenbestez, elkarlanean jarraitzeko asmoa erakutsi dute. Lea Artibai Ikastetxetik esan dute horrelako elkarlanak “ezinbesteko abantaila” direla ikasleen motibaziorako eta hezkuntzarako: “Lea Artibai Ikastetxeak elkarlana eta berrikuntza nagusitzen diren baloreetan oinarritutako hezkuntzaren aldeko apustua berresten du”.
