Malax eta Latxi dira Lekeitioko Beteranoen Trinkete Txapelketako lehenengo finalistak
Domekan [martxoak 10] 10:00etatik aurrera jokatuko dute bigarren finalaurrekoa. Finala, berriz, martxoaren 24an izango da.
Argazkia: Akarregi Pilota Kirol Elkartea. Lekeitioko Trinketeko Beteranoen XVIII. esku pilota txapelketako lehenengo finalaurrekoa jokatu zuten joan den domekan [martxoak 3] 40 urtetatik 60ra bitarteko pilotariek. Mendatako Malax eta Elantxobeko Latxi aritu ziren Mallabiko Telleriaren eta Eibarko Madariagaren aurka, eta 30-23 irabazita, Malaxek eta Latxik lortu zuten finalerako lehenengo txartela.
Partida erabakigarria jokatu zuten pilotariek. Hasierako tantoetan txaflana eta frailea erabiliz Telleria izan zen jokoaren jaun eta jabe markagailuan zortzi tantorainoko abantaila lortuz: 8-2, 15-8… Partida pixkanaka orekatuz joan zen: “Partida orekatu egin zen aurreko jokaldi batean Malaxek pilotakada bat jaso zuenean buruan. Sustoa bakarrik izan da”. Horren ostean Malaxek apur bat mareatuta jarraitzen zuen arren, markagailua berdintzeko gai izan zen, 19-19. Malaxen sake laburraren ondorioz 21. tantoa eskuratu zuten Telleriak eta Madariagak, baina segituan Latxik egindako dejadak eta Malaxen moztutako pilotak 22-28ra eroan zuen markagailua, irabazleen alde.
Jarraian Telleriak eta Madariagak postuak aldatu zituzten markagailuari buelta emateko ahaleginean, baina Telleriak sarera bidalitako pilota 23. eta euren azken tantoa izan zen. Malaxek eskuratu zituen azken bi tantoak berriro ere ohiko postuetara itzulita jokatu zituzten.
Antolatzaileek adierazi dute irabazleak “bikain” aritu zirela, zortzi tanto sakez lortuz: “Partida luzea jokatu zuten, ordubetetik gorakoa. Azkenean aurten txapeldun izateko faboritoak direnek irabazi dute”. Malaxen eta Latxiren aurka arituko diren bigarren finalistak domeka honetan [martxoak 10] jakingo dituzte. Senior mailan berriz, bi bikote daudenez zuzenean daude finalerako sailkatuta: Jaunarenak eta Condek jokatuko dute Astigarragaren eta Etxezarragaren aurka. Finalak, berriz, martxoaren 24an jokatuko dituzte, 10:00etan hasita.
Senior mailako finala Jaunarenak eta Condek jokatuko dute Astigarragaren eta Etxezarragaren aurka. Argazkia: Akarregi Pilota Kirol Elkartea.
