Ondarroa Lagunkoia egitasmoa berrartuko dute
2021ean aurkeztu zen diagnostikoa oinarri hartu eta lanketagaz hasteko herri batzarra deitu dute; martxoaren 11n, 18:00etan, Kofradia Zaharrean.
Ondarroa Lagunkoia proiektuari helduko dio, berriz, Ondarroako Udalak eta herritar orori irekita egongo den batzar irekia zehaztu dute; martxoaren 11n, 18:00etan, Kofradia Zaharreko bigarren solairuan. Herriko adinekoak protagonista bihurtu eta horiei berba eta lekua emateko helburugaz jaio zen proiektua. Herritarrei egindako inkestetan jasotako erantzunen bidez, herria zenbateraino den lagunkoia aztertu eta proposamen berriak jasoz.
Diagnostikoa berrartu eta lanketarekin jarraituko dute. “Herriari berriro zabaldu nahi diogu diagnostikoa nola egin zen, zertarako egin zen eta ekintza plana hartu eta martxan ipini”, azaldu du Esti Arruti Ongizate zinegotziak. Hortaz, lehenengo hitzordua finkatu dute eta jendeari hurbiltzeko deia egin diete: “Herri batzarra jendea animatzeko bide bat izatea nahi dugu, lehengo ekintza plana eskuan izan eta heldu egingo diogu”.
Aurrekariak. Antiguako Ama Elkarteak eta Ondarroako Udalak elkarlanean abiarazitako Ondarroa Herri Lagunkoia egitasmoak 2020an hasi zuen bidea. Proiektuan 65 urtetik gorako ondarrutarren iritziak jaso zituzten, herriaren alor ezberdinen ingurukoak; irisgarritasuna, zirkulazioa, segurtasuna, gizarte laguntza, garraioa, aisialdia eta azpiegiturak. Iritziak jasota diagnostikoaren emaitzak herritarren eskura ipini zituzten.
