Zuzeneko autobus zerbitzua areagotzeko eskaera udalera eraman dute
Alamedako Pentsionistek mozioa erregistratu zuten atzo [martxoak 4] Ondarroako Udalean, 3. 141 sinadura bildu ostean.
Bilbora edo Galdakaoko ospitalera joateko garraio publikoaren maiztasuna areagotzeko eskaera egiteko helburuagaz sinadura bilketarekin martxan hasi ziren abenduan Ondarroako Alamedako Pentsiodunak. 3.141 sinadura bildu ostean eta egindako lanketa abiapuntu hartuta mozioa aurkeztu zuten atzo [martxoak 4] Ondarroako Udalean.
Astelehenero pentsioengatik eta etorkizun hobeago batengatik borrokatzeko biltzen dira Alamedan, baina pentsio duinen aldeko borroka ez dute borroka bakarra, “pentsioniston egoera eta ditugun baliabideak geroz eta txarragoak baitira egunerokotasunean”.
Garraioaren arazoa lehentasun bilakatu da herrian, mugikortasunari eragiten dion arazoa baita Ondarroa eta Bilbo lotzen dituen autobus zerbitzuaren iraupena eta maiztasuna. Arazoaren “larritasuna” ikusita, martxoaren 20ko bilkuran eskariarekin bat egin eta Bizkaiko Foru Aldundiari zenbait eskaera egiteko babesa eskatuko diote bi udal taldeei.
Eskaera nagusia Ondarroa eta Bilbo arteko zuzeneko zerbitzu gehiago ipintzea da, Galdakao Usansolo ospitaletik igarota. “Gaur egun goizean goiz dauden bi autobusak ez dira nahikoa. Une honetan Bilbora joan etorria egin behar duenarentzat bidaia oso luzea egiten da, denbora asko behar izaten da”. Hortaz, “gutxienez” beste bi zuzeneko zerbitzu gehiago egotea eskatzen dute, bai joateko eta baita bueltatzeko ere.
