Euskaldunek eta venezuelarrek bat egingo dute 23. Korrikan
Venezuelako Kontsulatuak Euskal Herrian bizi diren Venezuelako eta latinoamerikako herritar guztiak gonbidatu ditu eurekin batera 23. Korrikan parte hartzera.
Venezuelako Kontsulatuak zuzenean parte hartuko du 23. Korrikan, Ziortza-Bolibarren kilometro bat eginaz; Hala jakinarazi dute gaur [martxoak 6] Ziortza-Bolibarren egin duten agerraldian. Bertan elkartu dira, besteak beste, Glenna del Valle Cabello Venezuelako konsul generala, Angelica Orozko Bilboko EH Bilduko zinegotzia, Andoni Lariz Ziortza-Bolibarko alkatea, Beñat Ibaibarriaga Simon Bolibar museoko teknikaria eta Orkatz Gandiaga AEK-ko arduraduna.
Udala eta Venezuelako Kontsulatua ados daude Simon Bolibar eurentzat inspirazio iturria dela esaterakoan: “Simon Bolibarrek irudikatzen du historian zehar Venezuelaren eta Euskal Herriaren artean egon den harremana eta bi kulturen arteko lotura”. Hori dela eta, oraingoan euskara sustatzeko elkartu dira.
Del Vallek azpimarratu du bi herrien arteko adiskidetza loturak aldarrikatzeak euskara sustatzeko ekimen guztiak era aktiboan babestea eskatzen duela: “Uste dugu bizi izateko etxe moduan euskal lurrak aukeratu dituzten venezolar eta latinoamerikar herritarrek euren kultura propioa gordetzeko ardura dutela, baina, aldi berean, euskal kultura aberasteko ardura ere bai; historikoki hain lotura estua izan dugun euskal kultura aberastekoa”. Hori ardatz hartuta, gizarte berdinzale eta kohesionatuago bat eraikitzerako bidean ekarpen handia egin dezaketela uste dutela esan dute, “euskaraz murgildu eta euskara ikasiz”.
Deialdi zuzena. Agerraldiagaz amaitzeko, Euskal Herrian bizi diren Venezuelako eta latinoamerikako komunitate guztiari dei egin diete euskarara eta euskal kulturara hurbiltzeko: “Horregatik, hemendik dei egin nahi diegu Venezuelatik eta Latinoamerikatik etorri diren herritar guztiei martxoaren 20an Ziortza-Bolibarrera etor daitezen Kontsulatuaren kilometroan korrika egitera eta euskarari babesa erakustera. Korrikaren ekimen zoragarri honetan guri laguntzera gonbidatzen zaituztegu”.
