Korrikaren aldeko bideo herritarra grabatuko dute Lekeition
Zapatuan [martxoak 9] 11:30ean elkartuko dira herritarrak, Talan. Horrez gain, asteburuan Bizkarsoro filma ere ikusgai egongo da.
Egun gutxi falta dira 23. Korrikari hasiera emateko. Irunen hasi eta Baionan amaituko da aurtengo ibilbidea, eta Lea-Artibai eta Mutrikutik martxoaren 20an pasako da. Harro herri lelopean pasako da korrika, eta Lekeitiarrek ongi etorri beroa emateko asmoz bideo herritarra grabatuko dute zapatuan, martxoaren 9an (eguraldi txarragaz atzeratu egingo dute bideoaren grabaketa). 11:30ean Talan elkartuko dira herritarrak eta herrian zehar grabatuko dute bideoa: “Talan hasiko gara. San Pedropetik portura joango gara, eta portutik plazara”.
Bideoaren helburua korrika balioan jartzea dela azaldu dute: “Euskaldunontzako Korrikak daukan garrantzia azpimarratu eta goraipatu nahi dugu. Bestalde, herritarrak Korrikan parte hartzera bultzatzeko ere baliatu nahi dugu bideoa”. Bideoa grabatu eta prest dagoenean sare sozialetan zabalduko dute.
Beste hainbat ekintza ere antolatu dituzte, “denak ildo beretik”. Egitaraua aurrerago jakinaraziko duten arren, Korrika Lekeitiotik pasatzen den egunerako “egitarau zabala” antolatu dutela aurreratu dute. Hala ere, horren aurretik asteburuan Bizkarsoro filma proiektatuko dute Ikusgarrin. Martxoaren 9an eta 10ean 19:30ean, eta martxoaren 11n 20:30ean egongo da ikusgai. Sarrerak Lekeitioko Zinemazaleen web orrian edo lehiatilan eskuratu daitezke, 6 euroren truke (bazkideetzat, 4 euroren truke).
