Suteen aurkako zerbitzua eskainiko du Lekeitioko Udalak
80 urtetik gorakoentzako doako zerbitzua izango da. Su detektagailuak jarriko dituzte.
Lekeitioko Udalak doako hainbat zerbitzu emango dizkie herriko nagusienei. Horien artean, larrialdietan ebakuazioa errazteko plana eskainiko dute: 80 urtetik gorakoentzako suteen aurkako detektagailuak jartzeko aukera eskaini dute. Hala, gutuna helduko zaie etxera, azterketa egitera joango direla jakinarazteko.
Azaldu dutenez, arriskuen azterketa bat egin ostean, suteen aurkako detektagailu bat jarriko dute, etxebizitzaren krokisa jarraituz. Horrekin batera, gizarte langileek elkarrizketa bat edukiko dute erabiltzaileekin, euren beharrizan sozialak antzeman, eta beharko balitz, irtenbidea emateko. Horren ostean, urtero mantentze zerbitzua emango zaie erabiltzaileei, euren detektagailua aldatu eta gizarte langileekin beste elkarrizketa bat eginez.
Gutuna jaso ez duten 80 urtetik gorako lekeitiarrek udaletxera deitu dezakete (94-603 41 00) zerbitzua eskatzeko. Informazio gehiago nahi dutenek, aldiz, 667 65 21 10 zenbakira deitu dezakete.
