EH Bilduren proiektu falta salatu du Lekeitioko EAJk
Besteak beste, gastu arrunta nabarmen handitu dela, gardentasunik eta herritarren parte hartze prozesurik eman ez dela eta Lekeitio hobetzen jarraitzeko inbertsio proiekturik ez dagoela salatu dituzte.
Lekeitioko EAJren udal taldeak adierazi du EH Bilduk aurkeztutako 2024ko udal aurrekontuen aurrean abstenitu egin dela, “EAJtik egindako ekarpenak burutzeko konpromisoa hartu dutelako”. Hala ere, udal gobernuaren proiektu falta salatu dute. Besteak beste, gastu arrunta nabarmen handitu dela, gardentasunik eta herritarrek parte hartze prozesurik eman ez dela eta Lekeitio hobetzen jarraitzeko inbertsio proiektu berririk ez dagoela salatu dute.
Kezkagarritzat jo dute EH Bilduk aurkeztu dituen aurrekontuetan ez sartu izana oposizioan zeudenean egiten zituzten ekarpen batzuk, adibidez, herrian aterpea sortzea, Abaroa Jauregia berreskuratzea eta Maderas de Lekeitio herriratzeko inbertsioak gauzatzea: “Badirudi lehentasunak aldatu direla”.
Etorkizunera begirako “herri proiektu falta” ere salatu dute EAJko kideek, horrek “paralisia eta inbertsio eta proiektu berrien falta” ekar lezakeelako: “Agerian geratzen ari da ia urtebete daraman udal gobernu honen immobilismoa. Izan ere, EH Bilduk aurkezten duen aurrekontu proiektuko inbertsio gehienak aurreko legealdian EAJk aurreikusitako eta Europar Batasunetik lortutako 1.000.000 euroko Next Generation diru laguntzekin buru beharreko proiektuak dira”. Gaineratu dute, ez dutela udal gobernuaren hurrengo urteetarako proiektuen berririk: “Zoritxarrez, EH Bilduren gobernua hasi denetik ia urtebete pasatu den honetan ez dakigu zer eskaintzen dioten Lekeitioko herriari hurrengo lau urteetarako. Ez daukagu legegintzaldiko proiektuen berririk”.
Lekeitioko EAJren udal taldeak bost zuzenketa proposatu ditu eta ekarpen gehienak onartu ditu EH Bilduren udal gobernuak.
Parte hartzeari dagokionez, aurrekontuan egiteko prozesua “erabat iluna, zurruna eta primitiboa” izan dela salatu dute, aurrekontuak ez direlako batzordeetan landu eta ez delako herri batzarrik egin. Hori ezin dela onartu uste dute: “Ezinbestekoa da gardentasun eta parte hartze printzipioei eusteko herritarrei aldez aurretiko informazioa ematea”.
Bestalde, zaintzari ere erreparatu diote, eta “hemen ere huts” egin dutela adierazi dute: “Zaintzarekin ere tematuta ibili izan dira. Zaintza erdigunera ekarri behar dela, eremu pribatutik komunitatera, duintasunera. Gizarte Ongizatera bideratutako aurrekontu sailak ez du aldaketarik izan eta azaroaren 7an egin zen lehen batzordetik hona ez da gehiagotan deitu”.
Azkenik, zuzeneko kontratazioari dagokionez, 2012an gertatu zenarekin alderatu dute: “Berriro ere, EH Bilduren gobernuarekin 2012an gertatu moduan inongo hautaketa prozesu publiko barik pertsona bat kontratatuko da udaleko komunikazio arduradun moduan. Orain arte lan horretan zebilen langile publikoari zeregin horiek kendu eta udal langilea ez den EH Bilduren konfiantzazko pertsona bati eman zaizkio”.
Ekarpenak. Bestalde, jakinarazi dute Lekeitioko EAJren udal taldeak bost zuzenketa proposatu zituela, eta ekarpen gehienak onartu dituela EH Bilduren udal gobernuak. “2024an jarraipen zorrotza egingo dugu egindako eskariak burutzen direla ziurtatzeko”. Eskarien artean daude Zumatzeta eta San Inazio inguruko berriztatze prozesuan aurrera jarraitzeko proiektua egitea, Maderas de Lekeitioko eta Antzorizko eremua herriratzea eta ingurunea berreskuratzen hastea, Eluntzetako bidea saihesbidearekin eta Lea ibilbidearekin lotzea, Lekeition etxebizitzak eskuratzeko dagoen arazoa aztertu eta neurriak ezartzeko ikerketa burutzea eta alde zaharra birgaitzeko plan berezia eguneratzeko prozesuagaz hastea.
