Ispasterrek mendi bizikletako Green Series txapelketako hirugarren proba hartuko du
Domekan [apirilak 21] maila desberdinetako 200 txirrindularik baino gehiagok parte hartuko dute.
25 urtetan ziklo kross lasterketak antolatu zituen Ispasterko Ipargorri txirrindulari elkarteak. Erreferente bilakatu zen Lea-Artibai eskualdean. 2014an antolatu zuten azken aldiz. Hamarkada bat eta gero, diziplina desberdin bategaz, baina ostera ere mapan kokatu nahi dute Ispaster. Mendi bizikletako Green Series txapelketako hirugarren proba hartuko du domekan [apirilak 21] 09:30etik aurrera eta 15:00ak arte.
Hain zuzen ere, iaz inauguratu zuten mendi bizikletako ibilbidearen lehen lasterketa ofiziala izango da. 4 kilometroko ibilbidea da, 144 metroko desnibelagaz eta adin guztietako 200 txirrindularik baino gehiagok parte hartuko dute, kadeteetatik 50 urtetik gorakoak arte. Basokoetxe industriagune ondoko basoan dago kokatuta zirkuitu iraunkorra: “Zabalik dago beti, urte guztian nahi duenak bertara joan eta erabiltzeko. Udalak konpromezua hartu du mantentze lanak egiteko, batez ere, belarra eta sasiak kontrolatzeko”.
Antolatzaileek bere “edertasuna eta naturaltasuna” nabarmendu dute pinu eta haritz artean dagoelako. “Ibilbide dibertigarria dela esango nuke, ez dauka aparteko zailtasunik, baina bai hainbat oztopo tekniko. Igoera luze bat dauka eta igoera bera zein jaitsiera teknikoagoa da, hainbat trialera daude eta goikaldea da gunerik zailena”.
Orain arte erabili dutenek, inguruko txirrindulariek batez, azpimarratu dute “erabilgarria eta entretenigarria” dela, beraz, espero dute kanpotik datozenek ere iritzi bera izango dutela. “Parte hartzaile gehienak bizkaitarrak izaten dira, baina badaude gipuzkoarrak ere eta urrunagotik datozen kantabriarrak, adibidez”.
Antolatzaileek gogoratu dute goiz osoko plana dela eta txosna jarriko dutela jan-edana emateko. Gainera, eguraldia badirudi lagun izango dutela, horrenbestez, inguruko herritarrei bertaratzeko deia egin diete.
