Harrobiaren erakustaldia, etxeko uretan
Ondarroa Arraun Elkarteak Euskadiko Trainerilla Txapelketako banderak eskuratu ditu emakumezken kadete mailan, eta gizonezkoen gazte mailan. Absolutuetan, gainera, hirugarren postuan geratu dira. Mutrikuk hirugarren postua lortu du emakumezkoen kadeteetan.
Emakumezkoen kadete mailako podiuma. Argazkia: Ondarroa Arraun Elkartea. Joan den astean Bizkaiko Trainerilla Txapelketan egin legez, Ondarroak harrobian dituen harri bitxien erakustaldia plazaratu zuen atzo (maiatzak 19) etxeko uretan. Emakumezkoen kadeteetan eta gizonezkoen gazte mailan Euskadiko Trainerilla Txapelketako banderak lortu zituzten .
Gazteenen maila gorenekoa bada ere, nagusiak ere ez dira atzean geratzen. Ondarroa Arraun Elkarteko zazpikoteak brontzezko domina lortu zuen, Zierbena garaileak baino 15 segundo gehiago behar izanda. Irabazleek 14.35 behar izan zituzten 3500 metroak egiteko, eta bigarrenak, bermeotarrak 15 segundotara iritsi ziren. Bizkaiko Trainerilla Txapelketako probetan ere Bermeo eta Zierbena ibili dira garaipenaren borrokan, eta oraingoan zierbenarren alde jausi zen. Isuntzakoak izan ziren laugarrenak nagusietan.
Gizonezkoen gazte mailan garesti egon zen garaipena. Ondarrutaren eta Itsasoko Amaren arteko lehia estuaren ostean, ondarrutarren elkartera egin zuen Euskadiko Txapelketako banderak; 15.46,16 ko denbora markatu zuten, bigarrenek baino ia lau segundo gutxiago. Isuntzakoak ere ureratu zuten euren trainerilla gazteen mailan, baina ez zuten zorte onik izan: deskalifikatuak izan ziren.
Ondarrutarrak, gazte mailako banderarekin. Argazkia: Bermeo Arraun Argazkiak.
Emakumezkoetan, Isuntza izan zen eskualdeko ordezkari bakarra. Lekeitiarrak laugarren postuan helmugaratu ziren, Pasai Donibane irabazlea baino 41 segundo beranduago helduta.
Garaipena, estu.
Emakumezko kadeteetan, etxean lehiatzearen abantaila ezin hobeto baliatu zuten ondarrutarrek. Berdintasuna izan zen nagusi estropada horretan, izan ere, lehenengo bost sailkatuen artean zazpi segundoko aldea baino ez zen izan. 08.53,06an gelditu zuten denbora ondarrutarrek, eta Zarautzen ostean, Mutriku Arraun Taldekoek osatu zuten podiuma, 08.56,50ko denboragaz. Bostgarrenak izan ziren Mundakako Arraun Taldekoak, eta bederatzigarrenak Isuntzakoak.
Gizonezkoetan, Itsasoko Ama izendatu zen txapeldun, eta bostgarren denbora onena lortu zuten Isuntzako arraunlariek. Elantxobetarrak, lehenengo postuetatik urrun, hamaikagarren postuan geratu ziren.
