Etxebarriko BTT martxarako izen ematea, zabalik
Hurrengo asteburuan, hilaren 15ean, BTT martxa egingo dute Etxebarrian, 15:30etik hasita. Aurretiaz izena emateko aukera dago jadanik, www.rockthesport.com web orrialdean, hilaren 13ra bitartean; federatuek 20 euro ordaindu beharko dituzte, eta federaturik ez daudenek, berriz, 23 euro.
Urtero legez, txirrindulariek ibilbide bi edukiko dituzte aukeratzeko: luzeak 34 kilometroko luzera izango du, 1.200 metro positiboko desnibel metatuagaz; laburra, aldiz, 25 kilometrokoa eta 950 metrodun desnibelekoa izango da. Bietan ala bietan anoa postuak edukiko dituzte ziklistek, jatekoagaz eta edatekoagaz.
Beharrezko guztia, eskuragarri.
Antolatzaileek aurreratu dutenez, egunaz gozatzeko osagai den-denak eskura izango dituzte parte hartzaileek. Izan ere, bizikletak garbitzeko gunea, musikaz giroturiko irteera eta helmuga eremua edota dutxa zerbitzua egongo dira. Ez hori bakarrik: behin helmuga harrapatuta, oparien zozketak egingo dituzte, eta guztientzako parrillada ere egongo da.
