Berriatuak hirugarren urtez jarraian irabazi du zesta-puntako herriartekoa
Barikuan [ekainak 7] markina-xemeindarrak 2-1 gainditu zituzten Lekeitioko Santi Brouard pilotalekuan.
Argazkia: Berriatuko zesta eskola. Beste urte batez Berriatuko eta Markina-Xemeingo zesta eskolen artean erabaki zen Bizkaiko zesta-puntako herriartekoa. Markina-Xemeindarrak txapelketa osoan partidarik galdu barik heldu baziren ere, hautagai nagusiak izanez, berriatuarrek hirugarren urtez jarraian jantzi zuten txapela.
Lehendabiziko partida, kadeteena, erabakigarria izan zitekeen aurreikuspenen arabera. Txanton Uriartek eta Oinatz Garitagoitia markina-xemeindarrek 30-27 hartu zituzten mendean Aimar Urkiri eta Inhar Aldazabal. Hain zuzen ere, berdintasuna izan zen nagusi finaleko partida guztietan. Jubeniletan, Berriatua irabaztera derrigortuta zegoen finala berdintzeko, eta baita lortu ere. Luken Bilbaok eta Xuban Galdosek 25-30 gainditu zituzten Jokin Maguregi eta Peru Landaluze.
Horrenbestez, nagusien mailan erabaki zen Bizkaiko Herriartekoa. Esperientzia garrantzitsua izango zen emozioak kudeatzerakoan, asko baitzegoen jokoan. Eta alde horretatik, Roberto Lekuerena oso garrantzitsua izan zen, Amets Aldazabalegaz batera, 27-30 irabazi zieten Martin Ormaetxea eta Danel Mandiolari. Gauzak horrela, Berriatuko zesta eskolak hirugarren urtez jarraian irabazi zuen koroa, eta bide batez, Euskal Herriko herriartekorako txartela.
