Bigarren txandan egonkortu nahi dute
Bermeo Urdaibai jaun eta jabe izan da asteburuan [ekainak 29 eta 30] Eusko Label Ligako lehen bi banderetan Galiziako uretan. ETE ligan Ondarroa zazpigarren izan da.
Argazkia: Aitor Arrizabalaga. Bermeo Urdaibaik ezin izan du Eusko Label liga hasiera hobea izan. Asteburu perfektua osatu du: bi bandera, lidergoa eta ACTko 100. garaipena. Ez dago gehiago eskatzerik. Ezin daiteke esan ere ezustekoa izan denik, Bou Bizkaia hautagai nagusia baita.
Hori bai, gogotik lan egin behar izan zuen zapatuan [ekainak 29] zein domekan [ekainak 30] Galizian. A Coruñan aurkari zuzen guztiak bestelako txandetan izan zituen lehendabiziko estropada izateagatik. Bermeotarrek alde izan zuten azken txandan aritu zirela arraunean, hau da, erreferentzia guztiak izan zituzten. Hondarribiarena izan zuten marka nagusia, lehen bi ziabogetan atzetik ibili arren, hirugarren luzean aldeak ezartzen dituen martxa jarri zuten aurrea hartzeko. Azkenean 20:14.24ko denboragaz 11 segundoko aldea atera zioten Ama Guadalupekoari.
Hain zuzen ere, Lekittarra eta Ondarroa lehen bi sailkatuen txandan aritu ziren. Isuntza “haien estropadako” onenak izan ziren, txandan bigarren eta sailkapenean zazpigarren 20:53,92ko denboragaz. Justu atzetik geratu ziren ondarrutarrak segundo bakarrera. Biek ala biek sentsazio onak baieztatu zituzten.
Estuago. Domekan [ekainak 30] berdintasun handiagoa izan zen, itsasoaren egoera ere bestelakoa zen, olatu eta haizerik gabe. Horrez gain, lehen aldiz, sailkapen orokorraren araberako txandak antolatu ziren. Bigarren txandan aritu ziren Lekittarra zein Ondarroa, bertan egonkortzea bilatzen dute biek. Orio eta Getariatik urrun, bakoitzak bere estropada egiten saiatu zen. Ondarrutarrak hobeto egokitu ziren, lekeitiarrek gehiago sufritu zuten. 20:01,50eko denbora lortu zuen Ondarroak eta 14 segundo gehiago behar izan zituen Isuntzak, zazpigarren eta bederatzigarren geratu ziren hurrenez hurren.
Ohorezko txandan ere gogotik egin behar izan zuen arraunean Bermeo Urdaibaik bandera lortzeko. Aurkari zuzenak izan zituen ondoan eta lehen ziabogan argi geratu zen lana derrigorrezkoa izango dela, hiru segundotan sartu ziren lau traineruak. Hirugarren luzean bermeoatarrek hain berea duten erritmo aldaketa egin duten, baina oraingoan Zierbenak bakarrik eutsi zuen. Azkenera arte estutu behar izan zuten Iker Zabalaren arraunlariek garaipena lortzeko, bakarrik 2 segundo eskaseko tarteagaz: 19:34.65.
Argazkia: Ondarroa Arraun Elkartea.
Emakumezkoetan ere Arraun Lagunakek indar erakustaldi berdinagaz irabazi zituen bi banderak. Hurrengo asteburuan zapatuan [uztailak 6] Donostian ariko dira eta domekan [uztailak 7] Zierbenan. ETE ligan, bigarren estroapada asteburua izan da. Eta lehen mailan bezala, arraun elkarte batek erabateko nagusitasuna erakutsi du orain arte: Zumaiak. Zapatuan Donibane Lohitzunen eta domekan Zumaian, bietan emaitza bera lortu zuten ondarrutarrek: zazpigarren postua.
