Goraino bete dute frontoia amorotarrek Herritarren Eguna ospatzeko
San Martin jaietan murgilduta daude Amoroton: gaur [uztailak 6] Herritarren Eguna ospatu dute, paella artean.
Jazzekuk taldeak irabazi du paella lehiaketa. Kanpoan euria ari bazuen ere, giro ederrean elkartu dira amorotarrak Herritarren Eguna ospatzeko asmoz. San Martin jaietan ohitura duten bezala, paella lehiaketa egin dute gaur [uztailak 6]. Eguraldian eraginez, plazan elkartu beharrean frontoian elkartu behar izan dira herritarrak, baina hori ez da oztopo izan jai giro bete-betean murgiltzeko.
Hala, 12:30ean eman diete hasiera paella lehiaketari; guztira hamar izan dira parte hartu duten taldeak. Bakoitzak bere errezeta eta osagai sekretuak eroan ditu, eta bi orduz paella prestatzen aritu ostean, 14:30erako amaitu dituzte lanak. Hala, talde bakoitzeko partaide bat izan da epailea, eta euren taldearen paella izan ezik, gaiontzeko denak puntuatu dituzte. Paellaren itxura, zaporea, gatz puntua eta testura baloratu dituzte. Guztien artean onena Jazzekuk taldearen paella izan da: 140 puntu eskuratu dituzte gazteek. Kornerrekuk kuadrillak berriz, azkenengo urteetan lortutako bigarren postuari eutsi dio, 128 puntugaz. Hirugarren postuan, aldiz, Basurdeak geratu dira, 123 puntugaz.Â
Paellen dastaketa amaituta, bazkaltzeko ordua heldu zaie amorotarrei; guztira 250 lagunetik gora elkartu dira frontoian. Ostean ere, ez da zer eginik faltako Amoroton. 17:30ean galdera jokoan elkartuko dira, eta iluntzean musikaren txanda izango da: 20:00etan Andoni Ollokiegi egongo da plazan, eta ostean, Unidad Alavesa. Egunagaz goi-goitik amaitzeko DJ Amataki eta Lagunak egongo da. Joan-etorrietarako, gainera, autobusak egongo dira. Lekeitiotik Amorotora joateko autobusak 21:30an eta 22:30ean irtengo dira, eta Amorototik Lekeitiorako autobusak, berriz, 04:00etan eta 06:00etan.
Bihar [uztailak 7], aldiz, jaietako azken eguna ospatuko dute. Karta jokoak izango dira nagusi: 17:00etan mus txapelketa egingo dute, eta 17:30ean, briska txapelketa.Â
