Galbaixoak, eztanda egiteko prest
Gaur [irailak 13] danborradarekin hasiko dituzte jaiak. Galbaixotarren Eguna irailaren 22an ospatuko dute.
Badatoz herritarrek horren gustukoak dituzten jaiak, badatoz Galbaixo jaiak. Uda ezin hobeto amaitzeko, bost eguneko egitarau oparoa dute aurretik herritarrek, gaur hasi eta irailaren 22a arte. Galbaixotik hasi eta porturaino, jai giro ezin hobeak hartuko ditu herriko txoko guztiak.
Urtero bezala, Anaiarte Biltokiak antolatzen duen danborradarekin egingo dute eztanda jaiek. Urduritasuna, irrika eta alaitasuna, emozio denak elkartuta 22:30ean abiatuko da danborrada gaur, eta jaiak ez du etenik izango gaueko ordu txikiak arte.
Mutrikuarrek, baina, indarrak gorde beharko dituzte biharko ere. Xarma berezia duen eguna da herritarrentzat Galbaixo Eguna, eta hala erakusten du goizean-goizetik Galbaixoko ermitan egoten den giroak. Mezaren ostean herri kirolak eskainiko dituzte Ugaitz eta Aratz Mugertzak, Urdax Magunazelaiak, Aritz Nordek, Uxue Ansorregi Ibirik eta Maika Aristegik. Dena, gainera, Ansorregi eta Andonegi trikitilariek alaituko dute. Bestalde, antolatzaileek jakinarazi dute aurtengoan Galbaixon ez dela aparkalekurik egongo, eta beraz, autobusez edo oinez igotzeko deia egin dute; autobusak etengabe egongo dira martxan, 09:30etik 14:00etara, euro baten truke.
Jan eta edan gogotik egin ostean, 18:00etan Mutrikuko jaietan hutsik egiten ez duen sokamuturra egongo da. Ostean, berriz, musika izango da protagonista: 19:30ean Eingo taldearen kantu eta dantza kalejira egongo da, eta 22:30ean, berriz, Oxabi taldearen kontzertua.
Umeek ere, nola ez, edukiko dute zer egin jaietan, eta batez ere, Galbaixo Txiki Egunean: haur parkea, erraldoiak, buruhandiak, pottokak… Denen gusturako ekintzak egongo dira domeka goizean. Aldi berean, gainera, Txoko Eder elkarteak antolatzen duen marmitako lehiaketa egongo da Beheko plazan; urtero bezala, egongo da enkantean Piñastegi Egunerako marmitakoa erosiko duenik ere. Egunagaz amaitzeko, berriz, zesta zaleek gorriz markatuta dute hitzordua helduko da: Galbaixotako zesta jaialdia.
Piñastei Eguna astelehena izango den arren, ez die askorik axolako mutrikuarrei. Galbaixotik portura jaitsi, eta aparteko giroa egongo da bertan. Aurtengo aldaketa nabarmenena sokamuturra izango da: goizeko sokamutur saioaren partez, arratsaldean bi orduko saioa egongo da. Sokamuturraz gain, baina, beste hamaika ekintza ere egongo dira portuan. Aizabia Elkarteak, esaterako, sardina erreak eskainiko ditu, baita jubilatuentzat hamaiketakoa ere. Umeentzako ekintzak ere ez dira faltako: erraldoi eta buruhandien konpartsaren kalejira, zinga ikastaroa eta txapelketaz gain, umeentzako kayakak egongo dira, baita txirrista ere, Intxirrian. Nola ez, egun guztian giro ederra ipintzeko ardura musika bandak edukiko du.
Auzotarren eguna. Galbaixo jaiak Galbaixotarren Eguna ospatzeagaz batera amaituko dituzte, irailaren 22an. Antolatzaileek jakinarazi dute egun horretan ere ez dela Galbaixon aparkatzeko aukerarik egongo; autobusak egongo dira 11:30ean eta 16:30ean igotzeko, eta 14:30ean eta 20:30ean jaisteko. Hala, goizean meza egongo da hiru auzoetan hildakoen alde, eta jarraian Gure Ametsa Dantza Taldeak emanaldia eskainiko du. Arratsaldean, berriz, Julen Magoaren emanaldia egongo da, baita bolo txapelketa, pottokak eta umeentzako txokolatada ere. Egun guztian, gainera, Laja eta Lutxurdio trikitilariak ariko dira musika ipintzen.
![[EGITARAUA]](https://lea-artibaietamutriku.hitza.eus/site/files/2024/09/galbaixotako-egitaraua.png){kind=link}