Miruaitz, ospakizunaren eta oroimenaren gordeleku
Etzi [irailak 15], Galbaixo Txiki egunez, I. Egurbide Memoriala zesta-punta jaialdia egingo dute, txikien kinielak eta nagusi mailakoen partidu batek osatuta.
Zesta-punta kirol soil bat baino askoz gehiago da mutrikuarrentzat: tradizio handia du herrian, eta zesta-punta partiduak mugarri esanguratsu izan ohi dira urtez urte hala Malen jaietako, nola Galbaixo jaietako ospakizun egitarauetan. Aurtengo galbaixoetan ere, ez da gutxiago izango: Miruaitz pilotalekua goi mailako lehiaren epizentro bihurtuko da domekan [irailak 15], Galbaixo Txiki egunean. 21:00etan hasiko da ikuskizuna, eta doako sarrera edukiko du.
Parte hartuko duten lau puntistetatik hiru Mutrikuko bizilagunak izango dira: Eñaut Urreistik, Ion Ibarluzea markina-xemeindarragaz bikotea osatuta, aurkari izango ditu bere herrikide Erik Mendizabal eta Mikel Mantzisidor. “Maila handiko neurketa estua” izatea aurreikusten dute Danok Bat klubeko antolatzaileek: “Bikote bietako bat ere ez da hautagai argia eta, horrenbestez, partidu gogorra, bizkorra eta fisikoa izateko osagai guztiak dauzka”. Mendizabal izango da lau pilotarietatik eskarmentu gehien duena, gainontzekoak oso gazteak baitira: “Dena dela, laurek sobera frogatu dute maila handia dutela, eta egungo puntistarik onenen pare daudela. Mendizabalek berak ere, oraindik kalitate handiko jokoa dauka, eta seguru gaude hori kantxan erakutsiko duela”.
Pilotaren ikurretako bat.
Aurtengo festibala, gainera, I. Egurbide Memoriala modura bataiatu dute. Izan ere, herriko zesta-puntaren ikur nagusienetako bat, Jose Antonio Egurbide, iaz zendu zen, eta bere oroimenez atondu dute partidua: “60ko hamarkadatik 80kora bitartean aritu zen jokalari modura, baina beti egon izan da zesta-puntaren munduan oso murgilduta; iaz ere omenaldi berezia egin genion, oso hunkigarria izan zena”. Egurbidez gain, Urreisti eta Oaia Otaño puntista mutrikuarrek ere merezitako omenaldia jasoko dute etzi. Biak ala biak distiratsu aritu dira berriki lehiatutako 22 Urtez Azpikoen Munduko Zesta-Punta Txapelketan, Iruñeko Labriten. Urreistik, bakarka, bigarren urtez jarraian lortu du urrezko domina. Otañok, Elaia Gogenola berriatuarrarekin bikotea osatuta, zilarrezkoa eskuratu du.
Gaztetxoenei ere merezi duten plaza eskaini nahi diete. Hori horrela, txikien kinielak abiatuko du gaualdia: “Danok Bat gazteekin lan handia egiten ari da eta, egun, kluba osasuntsu eta sendo dago. Hainbat ume animatzen dira gure kirolean proba egitera, eta gehienak izugarri erakartzen ditu. Hori dela eta, harrobi lan horrekin jarraituko dugu aurrerantzean ere”.
