Merkatu plazetan erostearen truke, bertoko produktuen otzara
Ondarroako, Lekeitioko edo Markina-Xemeingo merkatu plazetan erostea bultzatzeko asmoz, bertan erostearen truke otzara bat irabazteko aukera egongo da hilero. Lehenengo zozketak irailaren 26an eta 28an egingo dituzte.
Merkatu plazetan erosteak sariak dakartza Lea-Artibaira. Lekeitioko, Markina-Xemeingo eta Ondarroako Udalek bat egin dute, beste behin ere, Lea-Artibai Landagarapena elkartearekin, eta merkatu plazetan erosketak egitea bultzatzeko asmoz, bertoko produktuekin osatutako otzara bat zozketatuko dute hilabetero.
Merkatu plazen eta azoken gainbeherari aurre egiteko asmoz, “egitasmo xume” batekin hasi nahi izan dute aldaketarako bidea: “Eskualdeko herriak kontziente dira merkatu plazen egoeraz, eta bultzatu egin nahi dute bertan erosketak egitea. Estrategia handiek denbora eroaten dute, eta hori ere etorriko den arren, pausuak ematen hasi nahi genuen. Ekintza xume honekin merkatuetan mugimendua sortu nahi dugu”.
Lea-Artibain, dituen biztanle kopururako, merkatu plaza “asko” dauden arren, “herritar askok ez dute ohiturarik bertara joateko”. Merkatu plazak balorean ipini, bertan mugimendua sortu eta herritarrak plazetan erostera erakartzeko asmoz, beraz, otzara bat zozketatuko dute hilero. Markina-Xemeingo azoka eguenetan izaten denez, zozketak hileko azken eguenean izango dira: irailaren 26an, urriaren 31n, azaroaren 28an eta abenduaren 12an. Lekeition eta Ondarroan azokak zapatutan izaten direnez, zozketak irailaren 28an, urriaren 26an, azaroaren 30ean eta abenduaren 14an egingo dituzte. Abenduan, Gabonak direla eta, aurrez egingo dute zozketa.
“Ekimen txikia” den arren, hurrengo urteetara begira hausnarketa sakonago bat egiteko asmoz hasi dute ibilbidea: “Badakigu honek ez duela merkatu plazetako dinamika egun batetik bestera aldatuko, baina, egongo da norbait, agian, ohitura hartu eta merkatu plazetan erosten jarraituko duena. Aurrerago ikusiko dugu beste zer zerbitzu eskaini daitezkeen merkatu plazetan, eta ea aukerarik egongo litzatekeen beste sistema bat ezartzeko”.
Zozketa egunak.
- Ondarroa eta Lekeitio.
- Irailak 28.
- Urriak 26.
- Azaroak 30.
- Abenduak 14.
- Markina-Xemein.
- Irailak 26.
- Urriak 31.
- Azaroak 28.
- Abenduak 12.
