Udazken giroa lagun, jende ugari batu da Ispasterko nekazal azokan
21 postu egon dira gaur [irailak 21] Ispasterren egin duten nekazal azokan. 11:00etatik 14:00etara herriko nahiz inguruetako jende ugari elkartu da herrian.
Udazkeneko giroa nagusi izan da gaur [irailak 21] Ispasterko nekazal azokan. 11:00etan zabaldu dute azoka, eta ez du etenik izan 14:00ak jo duten arte. Hiru ordu horiek askorako eman dute batzuentzat, aukera ugari egon baita.
Guztira 21 postu egon dira, gehienak, ekoizleak. Esnekiak, eztia, gozokiak, boltsak, panpinak… denetariko aukera egon da. Ekoizleetako asko, gainera, pozik agertu dira Ispasterko plazarekin: “Jendeari gustatzen zaio bertako produktua erostea, eta guk hori eskertu egiten dugu”. Hori da, hain zuzen ere, halako azokekin Ispasterko Udalak duen helburua: ekoizleei euren produktuak erakusteko toki bat ematea, eta herritarrek inguruko produktuak ezagutu eta erostea. Lekeitioko jostun talde bat ere izan da tartean, eta horiek ere gustura aritu dira josten Ispasterreko giroan.
Nola ez, jana eta edana ez dira falta izan azokan. Aurten, gainera, berritasun bat ere egon da: garagardo postua ipini dute. Era berean, Nagore Intxaustik artileagaz egiten dituen lanak erakutsi ez ezik, parte hartzeko aukera ere egon da. Taloen postu bat ere egon da, eta halako azoka askotan gertatzen den bezala, ilara luzeak sortu dira, jendearen gustukoa izan den seinale.
Animaliak ere egon dira azokan: poniak, zaldiak, behiak, ardiak, ahuntzak eta txakurrak, esaterako. Txakurrek arreta berezia piztu dute umeengan: Aulestiko Eusebio Bengoetxearen ardi txakurrak egon dira bertan, eta umeei txakurrekin jolasteko aukera eman die.
Hala, lehenengo nekazal azoka 2011n sortu zutenetik indarra hartzen joan da. Aurtengoa horrek erakusgarri argia izan da, izan ere, bertoko nahiz inguruetako jende ugari ibili da.
