Badator 24. Umeen Arrantza Lehiaketa
14:30ean emango diote hasiera lehiaketari zapatuan [irailak 28], eta momentuz, 300 lagun inguruk eman dute izena.
Zapatuan [irailak 28] egingo dute 24. Umeen Arrantza Lehiaketa, Arrigorri Itsas Arrantza Elkarteak antolatuta, 14:30ean. Txistularien doinuekin batera emango diote hasiera egunari, Musika Plazatik hasi eta herriko kaleak zeharkatuko dituen kalejiragaz. Behin Itsasaurrera helduta, bolandera hotsagaz batera hasiko da lehiaketa, haur bakoitzak bere postua hartuko du Zubi Barritik Barra puntarainoko tartean eta arrantzatzeari ekingo diote.
4 urtetik 14ra bitarteko ume eta gaztetxoei zuzendutako lehiaketa da honakoa, eta momentuz, herriko ikastetxeetako 300 lagunek eman dute izena. Hala ere, ikastetxetatik kanpoko ume eta gaztetxoek aukera izango dute izena emateko lehiaketa hasi aurretik, Musika Plazan.
Baldintzei dagokienez, amuarekin arrantzatu beharko dute eta ezingo dute lazunik arrantzatu. Horrez gain, 10 zentimetrotik gorako arrainak soilik arrantzatu beharko dituzte.
Bigarren bolanderagaz amaituko da lehiaketa, eta urtero bezala, Herribixi kolektiboko kideek girotuko dute sari banaketa. 4-8 urte bitartean eta 9-14 urte bitartean arrain gehien arrantzatu dituztenek saria jasoko dute, eta baita, parte hartzaile guztien artean arrain pisutsuena eskuratu duenak. Horrez gain, 4 urteko partaideen artean zozketa egingo da, gazteenak direlako. Dena den, “denentzako zerbait egongo dela” aipatu dute antolatzaileek eta Ondarroako merkatalgo eta eragileek arrantza lehiaketari emandako sariak direla azpimarratu dute.
“Ondarroa herri arrantzalea izanda, egun polita izaten da. Herri osoa batzen gara; haur, gazte zein nagusi. Zubi Barritik Barra puntara arteko distantzian, kanabera uretara bota eta han pasatzen dugu eguna arrantzan. Gaztetxoenak arrantza mundura hurbiltzeko modua ere bada”, adierazi dute antolatzaileek.
