Ereño Gorria kareharria hizketagai izango dute Zientziaren Giltzaken hitzaldian
Laura Damas geologoak hitzaldia eskainiko du astelehenean [irailak 30], 18:30ean, Ereño Gorria kareharriaren inguruan.
Geologo betaurrekoak jantzi, eta inguruko harriei begira ipiniko dira astelehenean [irailak 30] ondarrutarrak. Zientziaren Giltzak elkarteak halaxe hasiko du ikasturtea, 18:30ean, Kofradia Zaharrean Laura Damas Molla geologoak eskainiko duen hitzaldiagaz. Rojo Ereño: Roca Patrimonial Internacional hitzaldia izango da, hain zuzen ere, entzuteko aukera egongo dena.
Damasen hitzetan, harria beti egon da gizakiarekin lotuta: “Tokian tokiko jatorria duten eraikuntzarako arrokek herri eta hirietako paisaia bereizten dute, nortasun ikur paregabeak sortuz. Gainera, gizakiak elementu berezi eta esklusiboekiko ahultasuna duela kontuan hartuta, jakina da zenbait harri barietatek bereizgarritasuna ematen dutela”. Hari horri tiraka, hain zuzen ere, nabarmentzen dira Araba, Bizkai eta Gipuzkoako hainbat kareharri ere: Markina Beltza, Mañaria Grisa edo Ereño Gorria, esaterako.
Besteak beste, azken horretan sakonduko dute astelehenean: “Aurten Zientzia Geologikoen Nazioarteko Batasunak Ereño Gorria kareharria Nazioarteko Ondare Harri izendatu du. Hala izendatzeko arrazoiak hainbat izan dira: K.o. I. mendetik arkitekturan edo eskulturan izandako erabilera, eskala masiboan esportatzen zelako, edota kareharri harekin eraikitako edo dekoratutako monumentuengatik, beste hainbat arrazoiren artean”.
Damasek azaldu duenaren arabera, Ereño Gorria kareharria Urdaibairen dago, eta hainbat harrobi ustiatu dira haren historian; hala, Ereño izena duen arren, harrobirik handiena Gautegiz Arteagakoa izan da. “Andrabide Harrobia edo Harrobi Gorria Bizkaiko Ondare Historiko izendatuta dago”, jakinarazi du Damasek.
Hori guztia azalduaz batera hasiko du hitzaldia, eta jarraian, kareharri “berezi” horretan gehiago sakontzeko aukera egongo da: “Ze ezaugarri ditu kareharri horrek hain esklusiboa izateko? Geologiaren ikuspuntutik, zer ikusi daiteke harrobietan eta Ereño Gorria kareharriarekin egindako eraikuntzetan? Noiz sortu zen? Zelan sortu zen? Gure ondarea ezagutzeak balioan ipintzea ahalbidetzen du”.
