Larruz Gaztak brontzezko sari bat irabazi du World Cheese Awards lehiaketan
Markina-xemeindarrak lehenengoz aurkeztu dira lehiaketara, sei hilabete inguruko ahuntz gazta onduagaz. Munduko Txapelduna Portugalgo Quinta do Pomar gaztandegia izan da.
Aurkeztutako gazta guztiak, mahaietan banatuta.World Cheese Awards World Cheese Awards lehiaketa gazta munduan egiten den nazioarteko lehiaketarik garrantzitsuena da, eta hamaika izan dira azken urteetan euskal gaztandegiek irabazi dituzten sariak. Aurtengo lehiaketara 4.786 gazta aurkeztu dituzte 47 herrialdetako gaztagileek, eta joan den barikuan ospatu zuten lehiaketa Portugalen. Ia 4800 gaztaren artetik, Markina-Xemeinera ere heldu da saria: Larruz gaztak brontzezko dominetako bat eskuratu du.
Parte hartzaile errekorra lortuta, “akzioz betetako eguna” izan zela esan dute. Urtero bezala, hainbat fasetan banatuta ospatu zuten lehiaketa. 104 mahaitan banatu zituzten gazta guztiak, eta hiru orduz, bi edo hiru laguneko taldeetan banatuta epaitu zituzten gaztak. Hainbat izan dira kontuan hartu dituzten alderdiak, besteak beste, itxura, usaina, ehundura, ahogozoa eta zaporea. Hori horrela, dominarik ez edo bontzezko, zilarrezko edo urrezko dominak banatu zituzten.
Ostean, mahai bakoitzeko gazta bat aukeratzen dute epaileek, eta gazta horri Super Urrea saria ematen diote. Super Urre guztien artetik, beste aukeraketa bat egin zuten eta 14 onenak aukeratu zituzten. Horien artetik irteten da urteko Munduko Txapelduna; aurtengoan, Portugalgo Quinta do Pomar gaztandegiko Quijo de Ovelha Amanteigado gaztak irabazi du txapelketa, 86 puntugaz. 2016 urtean lortu zuen Baskaranek World Cheese Awards lehiaketako Super Urre saria Santa Mañe izeneko gazta onduagaz.
Sariagaz, “oso pozik”. Iaz II. Euskal Herriko Gazta eta Esneki lehiaketara aurkeztu ziren Larruz gaztandegiko Gorka eta Iban Muniozguren eta Leila Ortiz, eta Euskal Herriko gaztarik onenaren saria lortuta itzuli ziren etxera. Wolrd Cheese Awards lehiaketara, aldiz, aurten aurkeztu dira lehenengoz, eta “oso pozik” jaso dute brontzezko domina: “Sari oso-oso garrantzitsua da. Guk aurten estreinakoz bidali dugu gazta, eta lehenengoz aurkeztu eta saria irabaztea, sekulakoa izan da. Oso pozik gaude sariagaz”.
Ahuntz gazta ondua izan da bidali dutena: “Bozpasei hilabeteko gazta izan da bidali duguna. Batzuk probatu genituen, eta hori zaporez ondo ikusi genuen. Gazta oso-oso ona zen, sekulako ehundura zuen, ahogozoa ere bai… kalitate handikoa. Azken finean, halako sariek bide onetik goazela berresten digute. Sari garrantzitsua eta esanguratsua da, eta guretzako sekulako poza izan da”.
Iban Muniozguren, sariagaz. Argazkia: Leartiker.
