25 urte, eta beste urte batez, 25 ekintza baino gehiago
Ondarroako Udalak herriko eragile eta taldeekin sortutako Gabonetako kultur egitaraua aurkeztu du. Urtarrilaren 14a bitartean, 30 ekimen antolatu dituzte. Berritasuna eta tradizioa uztartzen ditu kultur eskaintzak.
Gabonetako kultur egitarauaren aurkezpenaOndarroako Udala Ondarroako Gabonetako ekintzen egitaraua duela 25 urte banatu zuten etxez etxe lehen aldiz. 25. urteurrenean ez dira atzean geratu, eta 25 ekintza baino gehiago antolatu dituzte herriko eragile eta elkarteek Gabonetarako. Hain zuzen ere, abenduaren 4an hasi eta urtarrilaren 14a arte luzatuko den 30 ekimeneko egitaraua aurkeztu dute.
Ekimenak helburu nagusi bi dituela azpimarratu dute: batetik, herriko talde, elkarte eta eragileek antolatzen dituzten “ekintzak guztiak batera agertzea”, herritarrek aukera guztiak eskura izan ahal izateko; bestetik, herriko kirol, kultura eta aisialdi eskaintza “zabaltzea eta nabarmentzea”.
Egitarauari dagokionez, nabarmendu dute zer egitekorik ez dela faltako Gabonetan herrian, ekimen asko eta askotarikoak baitaude. “Ondarroa bizi-bizirik dago eta hori erakutsi nahi dugu Gabonetan ere”. Bi ekintza nagusi nabarmendu dituzte: biak ala biak ikus-entzunezkoak izanik ere, Kofradia Zaharrean izango dira. Aitor Oñederra Animadeba jardunaldietako zuzendariak bere ibilbideko hainbat animazio lan aurkeztuko ditu. Bestalde, Maribilli Festibala lehiaketaren baitan parte hartzaileen film laburrak proiektatuko dituzte: “Lanak berreskuratu ditugu, herritarrek ikus dezaten zelako sormen aberastasuna dagoen”.
Horrez gain, aretorik ez dagoenez, kiroldegian egingo dituzte urteroko ekintzak: bertso saioa, antzerkia eta Ondarrutar Naturalaren sari banaketa. Bertso saioan Miren Amuriza, Josune Aramendi, Xabat Galletebeitia eta Aitor Sarriegik parte hartuko dute, eta Ondarrutar Naturala urtarrilaren 3an 18:00etan egingo dute. Ez dute ahaztu nahi izan urtero “arrakastarik handiena” izaten duen umeentzako Porrotx, Marimotots, Pupu eta Lore pailazoen ikuskizuna. Sarrerak turismo bulegoan jarriko dituzte, salgai 5 eurotan.
Ondarroa 2024 eta leku aldaketak
Aurten badago berritasunentzako tarterik ere. Adibidez, Ondarroa 2024 urtekaria kaleratuko du Udalak eta Idiakez liburudendan, Kuriken eta Turismo Bulegoan egongo da salgai, 8 eurotan. Hori bai, aurten monografiko bezala argitaratuko dute. Lore Bengoetxea Ibazetak kirol bekaren bitartez idatzitako Emakumea eta kirola Ondarroan argitalpena da. Hala ere, antolatzaileek diote ez dutela baztertzen ohiko formatura itzultzea; artikuluak zelan bideratu aztertuko dute.
Herriko eragileen lana goraipatu nahi izan dute: “Argi dago ez dutela lanik egin barik utzi, herritarrei eskaintza zabala eskaintzeko”. Alde horretatik, Tripi-Trapu azokaren kokapena izango da berritasun nagusietako bat, aurten Berdura Plazan egingo dute. “Giro polita sortuko dela ez daukagu zalantzarik, eta herritarrek herriko sortzaileen produktuak ikusteko eta erosteko aukera izango dute”, adierazi dute.
Azkenik, zelan ez, herritarrei parte hartzeko deia luzatu diete, egitarau zabala eta oparoa prestatu baitute herritarren gozamenerako.
