Gazteek etxebizitzak alokatu ahal izateko erraztasun gehiago emango ditu Lekeitioko Udalak
Lekeitioko Udalak dirulaguntza ematea arautzen duen ordenantza aldatu du, gazte gehiagok etxebizitza bat alokatzeko aukera eduki dezaten; besteak beste, hileko alokairuaren muga kendu dute. Zabalik dago dirulaguntza eskaera egiteko epea.
Lekeitioko Udalak 18-35 urte bitarteko gazteei etxebizitza bat alokatzeko dirulaguntzak eskatzeko epea zabaldu du; otsailaren 28ra arte egin daitezke eskaerak, www.lekeitio.eus web orrian edo udaleko herritarrentzako arreta zerbitzuan (Barandiaran aretoa).
Aurtengoan, gainera, gazteei etxebizitza bat alokatzeko aukera gehiago eman nahi izan dizkiete, eta hainbat aldaketa egin dituzte dirulaguntza arautzen duen ordenantzan: “Etxebizitza eskuratzeko zailtasuna da gazteek gaur egun duten eragozpen nagusienetakoa bizimodu duina egin ahal izateko. Izan ere, bataz besteko emantzipazio-adina asko igo da azken urteotan, batetik, soldaten beherakadagatik eta, bestetik, emantzipazioa bermatzeko politika publiko eraginkorrak ez direlako egiten”.
Hori horrela, hainbat aldaketa egin dituzte. Alde batetik, orain arte etxebizitza partekatzen zutenek ez zuten dirulaguntza eskatzeko aukerarik; orain, ostera, etxebizitza partekatu arren, baldintzak betez gero, laguntza eskatzeko aukera dago. Gaineratu dutenez, udalaren dirulaguntza bateragarria da Eusko Jaurlaritzakoarekin. Bestalde, hileko alokairuaren muga kentzea erabaki dute; orain arte, 650 eurokoa izan da muga. Azkenik, orain arte gutxienez bi urtez Lekeition erroldatuta egon behar izan da eskaera egiteko; gaur gaurkoz, 2024ko urtarrilaren 1a baino lehen egon beharko da herrian erroldatuta.
Udalak adierazi du 20.600 euro bideratuko dituela etxebizitza alokatzeko dirulaguntzara.
