I. Lacturale Pilota Txapelketak harrobia eta goi maila uztartu ditu
Antolatzaileek lehiaren estreinako ekitaldiaren balorazio "bikaina" egin dute.
Gabon sasoian lehiatu dute I. Lacturale Pilota Txapelketa, Lea Ibarra-Motrollo Pilota Elkarteak eta Munitibarko Udalak antolatuta. Harrobia eta goi mailako esku pilota uztartu dituzte, eta antolakuntza “asebeteta” azaldu da: “Hala harmailetan, nola Youtubeko kanalean, txapelketak jarraipen handia eduki du”.
Eskolarteko topaketa herriarteko formatuagaz egin dute. Finala hilaren ean lehiatu zuten Zeanurik eta Zornotzak. Benjamin mailan lehenengoa 18 eta 2 gailendu arren, zornotzarrak 3 eta 18 nagusitu ziren alebinetan, eta 9 eta 18, aldiz, ume mailan. Sendotasunez poltsikoratu zuen garaipena Zornotzak. Egun berean, senior eta gazte mailetako emakumezkoen finalak ere lehiatu zituzten: lehen finalean, Lekerikabeaskoa eta Lopez de Okariz 22 eta 18 gailendu zitzaizkien Galdos eta Barainkari; bigarrenean, Etxagarai eta Gamindek 22 eta 14 irabazi zuten Garai eta Osesen kontra.
Biharamunean, gizonezkoen txanda ailegatu zen: kadete, gazte eta seniorrena. Kadete mailan, Paraguayo VII.ak eta Goikoetxeak 22 eta 12 irabazi zieten Bengoetxeari eta Olanori; gazteen finalean, markagailu berberagaz nagusitu zitzaizkien Ramirez eta Ibarzabal Saez eta Berozi. Azkenik, nagusien final handian, Gutierrez eta Uriondo izan ziren sendoenak, 22 eta 14, Albizuren eta Azpirozen aurka.
Errepikatzeko prest.
Lehen aldiaren arrakasta ikusita, antolatzaileak hurrengoari begira daude: “Oraindik edozer aurreratzeko goizegi den arren, ikusi dugu herritarrek begi onez hartu dutela lehiaketa eta, beraz, aurrera egiteko prest gaude”. Jasotako babes uriolagatik eta Lacturaleren babesagatik “eskertuta”, argitu dute formatua izan dela “hoberen” moldatu dena: “Harrobia, inklusioa eta goi mailako kirola ezkontzea ideia aparta izan da”.
