Berriatuko Master Series Txapelketak baditu bere lehen txapeldunak
Barikuan [urtarrilak 10] jantzi zituzten txapelak Arakistain-Lejardi eta Erkiaga-Argoitia bikoteek Mendibarren frontoia beste behin lepo bete zuten ikusleen aurrean.
Ihart Arakistain, Arai Lejardi, Aritz Erkiaga eta Ortzi Aldazabal Argoitia. Hizki larriz dituzte dagoeneko izen-abizenak jarrita lau puntistak Berriatuko Mendibarren frontoian. Hain zuzen ere, haiek dira Berriatuko Master Series txapelketako lehen txapeldunak. Atzo [urtarrilak 10] jokatu zituzten finalak. Beste behin, eta hirugarren barikuz jarraian, herriko eta eskualdeko zesta-punta zaleek ez zuten hutsik egin eta frontoia txiki utzi zuten. Ikusgarria izan da txapelketak izan duen harrera, atzo ere sarrera guztiak agortu ziren, salmentan jarri ziren egun berean amaitu ziren.
Jaialdia emakumeen Master Seriesagaz hasi da. Partida hasi baino bi ordu aurretik frontoia jada erdi-betea zegoen. Jendea pilota gosez. Elaia Gojenola herritarrari ez zaio animorik falta izan, baina finala hasieratik Arakistainen eta Lejardiren alde jarri da. Beti da gozagarria da Markina-Xemeingo pilotaria ikustea, baina Berriatuan are gehiago gainera. “Gehien gustatzen zaio
Arakistain eta LejardiEraman Jai Alai
n frontoia” dela adierazi du txapela irabazi ostean. Izan ere, eta atzean metro gutxiago defendatu behar duenez, solte eta erraz jokatzen du Lejardik. 8-3 eta 9-4 aurreratu dira marroiak eta sei tantuko aldeagaz irabazi dute lehen jokoa (15-9).
Bigarrenean gauzak estuago joan dira. Marroiak 8-4 aurreratu arren, Gojenolak eta Watkinsek bederatzina berdindu dute. Harmailak berotu dira orduan, baina berdinketaren ostean Arakistain eta Lejardi nagusitu dira berriro ere. Sopelako aurrelariak ere partida borobila jokatu du, piloteoan ez ezik errematean ere. Berriatuko klubekoa izanik, beso artean hartu eta airean altxatu dute Arakistan bere gertuko eta lagunek.
Intentzio argiak
Gizonezkoen partidan, Barandikak eta Zabalak Erkiaga jokotik kanpo uzteko intentzioarekin atera dira, hau da, jokoa Argoitia gaztearengana bideratu. Ispastertarrari ez diote jokoan sartzen, berak nahi beste behintzat. Aurrelari gernikarrak gainera, abiadura itzela ematen dio pilotari. Benetako misilak jaurti ditu Argoitiaren aurka, atzeko hormaren aurka jarri nahirik, baina ondo defendatu da berriatuarra, pilota gaitzak sartuta. Zabala ere seguru aritu da eta pilotari gogor emanez. Hala ere, Erkiagak egin ditu bereak, sahietsetik gehienbat.
Barandikak errebotean egin du 6 eta 5koa, Erkiagak dejadaz 9-7ko eta ikusgarria gernikarrak 13-11rako egin duen hormabikoa ere. Lehen jokoa 15-12 irabazi dute Erkiagak eta Argoitiak eta bigarrenean are estuago joan dira kontuak. Zabalak errebote zail bat eraman du bere burua lurrera botata eta seteko azken tantua ere berak egin du, txapa gainean moztuta (14-15). Desenpatean hala ere, huts gehiegi egin ditu bikote horiak eta ordura arte egindako lana ezin izan dute nahi bezala biribildu (5-1).
Momentu eta leku egokian egotea. Halaxe suertatu zaio aurten Ortzi Aldazabal Argoitia, pilotari gazte berriatuarrari. 17 urtereko atzelariak inoiz ez du ahaztuko 2024ko urte amaiera eta 2025ko hasiera. Winter Seriesean ordezko egotetik debutatzera eta Berriatuko Master Seriesean Aritz Erkiagarekin txapela lortzera.
Argoitia eta ErkiagaEraman Jai Alai
Hala ere, lehen Berriatuko Master Seriesaren irabazle nagusia Berriatuko herria izan da. Batzuetan, herriaren tamaina ez dator bat plaza horren garrantziarekin eta harmailen lekua mugatua bada ere, beste joko klase bat ikusteko aukera ematen du Mendibarrenek. Errepikatzeko modukoa txapelketa da.
