Euskal Kostaldeko Geoparkea Fitur nazioarteko turismo azokan egongo da
Madrilgo Ifema erakustazokan ospatuko da hitzordua, urtarrilaren 22tik [eguaztena] 26ra [domeka].
2024ko Fitur nazioarteko turismo azoka. Geoparkea Urtero legez, Fitur nazioarteko turismo azokan parte hartuko du Euskal Kostaldeko Geoparkeak, urtarrilaren 22tik [eguaztena] 26ra [domeka], Madrilgo Ifema erakustazokan. Hala, bi stand desberdinetan egongo da Geoparkea: “Batetik, Euskadiren gunean egongo da eta, bestetik, Munduko Geoparkeen Espainiako Sareak bigarren urtez jarraian jarriko duen standean”. Adierazi dutenez, Geoparkeko herrietako alkateak, zinegotziak eta turismo teknikariak egongo dira bertan, “azoka egunetan antolatuko diren jardueretan”.
Geoparkeko kideen arabera, Fitur turismo sektoreko “erreferentziazko” ekimena bihurtu da, eta bere ibilbidean zehar turismo industriako profesionalentzat “topagune globala” eta “negoziorako plataforma” ere bilakatu dela adirazi dute. Horrenbestez, Fitur bisitari profesionalei irekita egongo da lehen hiru egunetan, eta publiko orokorrari, asteburuan zehar.
Geoparkeko kudeatzailea den Leire Barriusok Euskal Kostaldeko Geoparkeak sortu duen azken “produktu turistikoa” aurkeztuko du Fiturrean: Geoparkeko bira. “Geoparkea hiru etapetan zeharkatzen duen 54 kilometroko ibilbide zirkularra da Bira. Kostaldeko GR ibilbide arrakastatsua luzatzeko eta lurraldearen barnealdea (Olatz, Lastur, Itziar) ezagutarazteko apustua da. Hiru etapatan banatutako trazaketa, azken batean, proposamen berri bat da lehendik dauden bidezidorretatik eta bideetatik igarotzen den Geoparkea sakon ezagutzeko. Entitate Laguntzaile diren zerbitzu turistiko eta ostatuak sustatuko ditu, produktu turistiko berri honekin”. Adierazi dutenez, urtarrilaren 23an [eguena] izango dute hitzordua, 10:00eta, Euskadiren gunean (9. pabiloia, C06), eta Munduko Geoparkeen Espainiako Sarearen erakusmahaian 13:00etan egongo dira.
Horrez gain, turismo azokan bertan, Geoparkearen promoziorako egindako bideo berria ere aurkeztuko da: “Geoparkearen aurkezpen txartel berria izateko jaio den ikus entzunezko pieza honetan, ondare geologikoa, naturala eta kulturala batu nahi izan dira lurraldearen irudi osatuagoa eta eguneratuagoa eman asmoz”.
Munduko Geoparkeen Espainiako Sarea bigarren aldiz egongo da Fitur Nazioarteko Turismo Azokan, Geoparkea, ordea, hastapenetatik egon da bertan: “Aurten 10 urte beteko dira UNESCOren Batzar Nagusiak UNESCOren Munduko Geoparkeen sorrera berretsi zuenetik. Geoparkeen berezitasunak eta paisaien ikusgarritasunak bat egingo dute eskaintza turistiko berritzaile bat proposatuko duen Munduko Geoparkeen Espainiako Sarearen standean”. Espainiako, Portugalgo eta Latinoamerikako geoparkeak Ifemako 7.a.19. pabiloian egongo dira.
Gainera, #geoparquesfitur25 traolarekin modu digitalean ere parte hartuko du azokan Geoparkeak, Euskal Kostaldeko Geoparkearen eta Munduko Geoparkeen Espainiako Sarearen Twitter, Facebook eta Instagram sareak erabiliz.
