Herriarentzat zabalik dagoen espazio pedagogiko berria zabalduko du Berakruz Ikastolak
Bihartik [urtarrilak 15] aurrera, 11:30etik 13:00etara zabalduko dute Goxo Txiki espazioa. Hiru gunetan banatu dute Goxo Txiki: jolas sensorialen gunea, jolas sinbolikoena eta ipuinen txokoa.
Ume eta gurasoentzatko espazio berri bat egongo da bihartik [urtarrilak 15] aurrera Markina-Xemeinen. Berakruz Ikastolak zabalduko du, hain zuzen ere, espazio hori: 0-2 urte bitarteko ume eta gurasoentzako tokia izango da. Nabarmendu dutenez, herri guztiarentzako zabalik egongo den espazioa izango da.
Goxo Txiki izenagaz, 11:30etik 13:00etara egongo da zabalik espazioa, astelehenetik barikura. Haurtzaindegira joaten ez diren umeentzat toki egokia izango da Goxo Txiki, herriko beste guraso eta ume batzuekin interakzioan goiza igarotzeko.
Hala, hainbat gunetan banatu dute espazioa: jolas sensorialen gunea, jolas sinbolikoena eta ipuinen txokoa. Azaldu dutenez, material bakoitzarekin QR kodigo bat egongo da; hura eskaneatu, eta materialaren inguruko azalpenak ezagutzeko aukera egongo da. “Dena azalduta egongo da bertara joaten direnek jakiteko zertarako den materialetako bakoitza. Gainera, aldian-aldian aldatuko dugu bertako materiala”, adierazi dute.
Berakruz Ikastola eta Arizmendi Ikastola elkarlanean aritzen dira, eta hala jakin zuten halako espazioen berri: “Arizmenditik esan ziguten espazio berri batzuk zabaltzen hasi zirela, haurtzaindegira joaten ez direnentzat, gehienbat. Amatasun bajak luzatu edo eszedentziak hartu, eta goizean noberak bere umearekin jolasteko toki bat edukitzeko asmoz zabaldu zituzten halako espazioak”. Eredu horri tiraka sortu dute Goxo Txiki espazioa; 94-616 60 30 telefonoa ahalbidetu dute informazio gehiago eskuratu edo galderak argitzeko.
