100 emakume inguru batu ziren Emakumik basatzan proiektuko lehenengo irteeran
Aurrera Mendi Taldeko kideek balorazio "oso positiboa" egin dute. Hurrengo irteera otsailaren 9an [domeka] izango da.
Emakumik basatzan proiektuko lehenengo irteeraAurrera Mendi Taldea Emakumik basatzan proiektua sortu berri du Ondarroako Aurrera Mendi Taldeak, mendiko jardueretan emakumeen parte hartzea bultzatzeko helburuagaz. Hori horrela, pasa den domekan [urtarrilak 12] egin zuten lehenengo mendi-irteera, eta gutxi gorabehera, ehun emakume inguru batu ziren. Herriko emakumeen erantzuna ikusirik, balorazio “oso positiboa” egin dute antolatzaileek: “Ez genuen espero horrenbeste lagun batuko ginenik. Aurrera Mendi Taldetik balorazio sakonagoa egingo dugu barikuan, baina oso harrera ona izan du proiektuak eta oso pozik gaude horrekin. Gainera, plan guztia ondo atera zen”.
Adin guztietako emakumeak batu ziren ibilbideetara, eta esperientzia aberasgarria izan zela aipatu dute antolatzaileek: “Adin guztietako jendea batu ginen, ume zein heldu. Hurrengo irteerako ibilbideari buruz galdetzen hasi zaigu jendea jada, baina oraindik ez daukagu guztiz itxita”. Nahiz eta ibilbidearen inguruko zehaztasunak falta, datari dagokionean, otsailaren 9an [domeka] izango da, 09:00etan Aurrera Mendi Taldearen lokalean.
Hiru ibilbidetan banatu ziren bertaratu ziren mendizaleak, bakoitzaren mailaren arabera: A, B eta C. A taldeak 8.4 kilometroko ibilbidea egin zuen, gorazko desnibelagaz: “Zaldunbideko eskaileretatik igo ginen, Iramategi baserritik pasa eta Mokau baserriko bidegurutzean Granjarutz egin genuen. Aldabe inguruko bidegurutzean erdiko bidea hartu eta Baraikura joan ginen, Tontorramendi azpitik pasata. Baraikutik Santa Krutzerako noranzkoa hartu genuen, eta ondoren, Saturraranera jaitsi ginen, eta pasealekutik berriro Ondarroara itzuli ginen”.
B eta C taldeko mendizaleek 14.7 kilometroko ibilbidea egin zuten, gorazko desnibelarekin. B Taldeak oinez egin zuen bidea, eta C taldeak, berriz, korrikan. “Ibilbide hauetan ere Zaldunbideko eskaileretatik igo ginen, eta Iramategira heldu aurretik bidezidorretik joan ginen. Hortik, Santa Krutzera, eta gero, Tontorramendira. Tontorramendiko atzeko aldetik jaitsi ginen Armintxara arte. Bertan, ezkerreko bidea hartu eta Zabaldegi igaro genuen, Berriro, Armintxa pasa eta Berrosasi eta Mokau baserriak pasa genituen, eta bidezidorra hartuz Ondarroara heldu ginen”.
Bertaratu ziren mendizaleak “pozik” agertu zirela azpimarratu dute Aurrera Mendi Taldeko kideek, eta ibilbide berriak ezagutzeko ere baliagarria izan zela. Horrez gain, datorren irteeran parte hartzeko deia egin dute.
-
- Emakumik basatzan proiektuko lehenengo irteera
