Baso landaketa egingo dute auzolanean Ziortza-Bolibarren
Zapatuan [urtarrilak 18] Muniozguren baserri inguruko partzela landatuko dute, Lurgaia Fundazioaren laguntzagaz. Baso autoktonoak edukitzearen garrantzia azpimarratu du Ziortza-Bolibarko Udalak.
Ingurumenaren inguruan herritarren kontzientziak pizteko asmoz, baso landaketa egingo dute zapatuan [urtarrilak 18] Ziortza-Bolibarren. Elkarlana eta auzolana ditu oinarrian ekimenak, izan ere, Ziortza-Bolibarko Udalagaz batera antolatu dute ekimena herriko lau kultur taldeek ere, ingurumenari begira hobekuntzak egiteko asmoz: Aranbaltz Kultur Elkartea, Bolintxu Energia Berriztagarrien Komunitatea, Markola Guraso Elkartea eta Kanpape Jubilatuen Elkartea. Era berean, Lurgaia Fundazioaren lana ere ezinbestekoa izango da ekimena aurrera eroateko.
09:00etan elkartuko dira Bolibarko plazan, landaketa egingo dute gunera joateko; kotxez hurbilduko dira lursailera. Udal ordezkariek azaldu dutenez, “irisgarritasun erraza” dauka eta 6 urtetik gorako umeak “erraz” ibili daitezke. Oinetako egokiak eroateko eskatu dute; gainontzeko tresna guztiak Lurgaiak ahalbidetuko ditu. Izena eman behar da info@lurgaia.org helbidera idatziz (izen-abizenak, adina eta telefono zenbakia ahalbidetu behar dira).
Hala, 29. poligoko 33. partzela landatuko dute, hau da, Muniozguren baserri inguruko 2,47 hektareako partzela: “Partzela erdia landatuta daukate Lurgaia Fundaziokoek, eta eremu bat utzi dute herritarrok auzolanean egiteko moduan”. Gaineratu dutenez, Lurgaiak Dantzaleku izeneko beste partzela bat ere landatuko du.
Izan ere, Eusko Jaurlaritzaren dirulaguntza eduki du udalak lurren erosketak egin eta landaketa egin ahal izateko. Azaldu dutenez, Ihobe programaren barruan eskuratu dute ingurumen dirulaguntza.
Udaletik nabarmendu dute ingurumenaren inguruan kontzientziatzeagaz batera, baso autoktonoak edukitzeak daukan garrantzia ikusarazi nahi dietela herritarrei. Halaber, hamar espezie inguru ari dira landatzen Lurgaiakoak, eta horiek izango dira herritarrek ere landatuko dituztenak, besteak beste, haritza, urkia, ostolizarra, gaztainondoa, erramua, gorostia, hostozuria, ametsa eta zuhandorra. Era berean, lurrak zaintzea, eta aldi berean, komunitatea zaintzea ere helburuen artean dituzte.
Landaketaren ostean luntxa egongo da auzolanean parte hartzen dutenentzako, eta ekimenagaz amaitzeko, argazki bateratua aterako dute.
