Ondarroako pentsiodunek sinadura bilketa jarri dute martxan, Herri Ekimen Legegilea babesteko
Astelehenetan Alamedan batzeaz gain, domeketan ere bertan egongo dira sinadurak batzen, eta barikuetan, Alde Zaharrera mugituko dira.
Astelehenero legez, Alamedan batu dira gaur [astelehena], 12:00etan, Ondarroako 140 pentsiodun, pentsio duinak aldarrikatzeko helburuagaz. Gainera, gaur, Euskal Herriko pentsiodunen mugimenduak aurkeztutako Herri Ekimen Legegilea babesteko sinadura bilketa jarri dute martxan, eta astelehenero Alamedan bertan sinatzeko aukera emateaz gain, domeketan ere bertan egongo dira, 13:30etik 14:00era, eta barikuetan, Alde Zaharrean batuko dituzte sinadurak, 19:00etatik 21:00etara.
Sinaduren helburua, mugimenduak aurkeztu duen Herri Ekimen Legegilea Legebiltzarrean eztabaidatu eta bozkatzea da. Honek, gutxieneko pentsioa gutxieneko soldatagaz parekatzea du helburu, hau da EAEn bizi diren 60 urtetik gorako pentsiodun guztiek gutxieneko soldataren pareko diru-sarrerak bermatuko dien pentsio gehigarrien sistema bat sortzea aldarrikatzen dute. 1.134 eurokoa da Espainiako Lan Ministerioak 2024rako ezarritako gutxieneko soldata, 14 soldatatan ordainduta, eta aurten, igotzea negotziatzen dabiltza. Beraz, Euskal Autonomia Erkidegoan gutxieneko soldata bat adostuko balitz, pentsio gehigarriak kalkulatzeko erreferentzia izango litzateke hori.
Sinadurak biltzeko bide desberdinak hartuko dituzte Ondarroako pentsiodunek:”Alde batetik, udaletxeagaz batuko gara, eta nolabaiteko inplikazioa eskatuko diogu; adibidez, bandoa pasatzea, postontzietan sartzen duten Udalbarriak aldizkarian publizitatea egitea, edo udaletxean sinaduran biltzea, adostutako ordutegiekin”. Horrez gain, herriko eragileekin jarriko dira harremanetan, sinadura bilketan inplikatzeko.
