Bai Euskarari ziurtagiriagaz bat egin dute Lekeitioko 62 establezimenduk
Herriko 75 komertzio eta tabernetatik 62k egin dute bat ekimenagaz; datozen hilabeteetan Bai Euskarari ziurtagiriaren ebaluazioak egingo dituzte.
Ander Goikoetxea Vazquez Lekeitioko Euskara zinegotzia eta Alex Zenarruzabeitia Unamuno Bai Euskarari Elkarteko aholkularia.Lekeitioko Udala Lekeitioko Udalak iaz sinatu zuen Bai Euskarari Elkarteagaz hitzarmena, euskararen erabilera indartu eta hizkuntza paisaia hobetzeko asmoz. Orduan hasi zuten elkarlana bi erakundeek, eta azken hilabeteetan hainbat ekimen ipini dituzte martxan: “Azaroan 75 saltokirekin harremanetan ipini ginen eta aurrez aurreko bisitak egin genituen. Guztira 62 establezimenduk Bai Euskarari ziurtagiria lortzeko pausoa ematea erabaki dute, hasierako helburua 30ekoa bazen ere”.
Hori horrela, otsaila eta martxoa bitartean Bai Euskarari ziurtagiriaren ebaluazioak egingo dituzte herrian: “Horien bidez, establezimendu bakoitzari dagokion ziurtagiri maila erabakiko da, eta entitateei laguntza eskainiko zaie beren hizkuntza beharrak asetzeko”.
Euskararen erabilera sustatutz, herriko identitatea indartu eta turismoarekin bateragarria egiteko asmoz hasi zuten elkarlana bi aldeek, eta bakoitzak bere aldetik lanean dihardu. Bai Euskarari Elkarteari dagokionez, ziurtagiria eskuratzeko “bere metodologia, irizpide eta tresnak” aplikatuko dituela jakinarazi dute, “prozesua ahalik eta eraginkorrena” izateko asmoz. Udalak, ostera, Plan Estrategikoa berritu du: “Etorkinei euskara klaseak eskaintzeko konpromisoa hartu dugu, herrian euskararen ezagutza erabilera sustatzeko helburuarekin”.
Erronka. Udalak jakinarazi duenez, Lekeition euskararen erabilerak “beherakada txiki bat” jasan du; gaur egun, %69koa da euskararen erabilera. Gaineratu dutenez, adin tarteei erreparatuz, 45 urtetik gorakoen artean “kezka berezia” dagoela nabarmendu dute: “Izan ere, talde horretan %57koa da erabilera”. Halaber, herriko egoera sakonago ezagutzeko asmoz, komertzio eta tabernekin diagnostiko bat egiteko asmoa dute: “Horretarako, Bai Euskarari ziurtagiriaren ebaluazioak baliatuko dituzte”.
