Ondarroako Udalak 51.000 euroko kalteordaina ordaindu beharko dio udaleko langile bati
Epaiaren arabera, udalak ez zuen prebentzioko legea bete, eta horrenbestez, udal langilearen osasunerako eskubidea "urratu" du.
Aste honetan ELA Euskal Sindikatuak jakitera eman duenez, Ondarroako Udalak 51.021,16 euroko kalte ordaina ordaindu beharko dio udaleko langile bati, «langilearen eta enkargatuaren arteko gatazkaren aurrean prebentzio neurririk ez hartzegatik». Bilboko Lan Arloko 12 zenbakiko Epaitegiak, 2025eko urtarrilaren 30ean emandako epaian zigortu zuen udala.
Sindikatuaren ordezkariek azaldu dute 2020an hasi zen lan gatazka dela, arduradun berri bat lanean hasi zenekoa: “Desadostasunak gorabehera, langileak antsietate bajaren lehen aldia urte horretako abenduan hasi zuen. 2022ko irailean, langileak gertaeren berri eman zion udalari, baina honek ez zuen ezer egin, eta aldi baterako ezintasun prozesu bat hasi zuen 2022ko azaroan, Gizarte Segurantzak lan-istripuagatik onartuta. ELA sindikatuaren errekerimenduaren ondoren, udalak kanpoko enpresa bat kontratatu zuen diagnostiko bat egiteko, eta horren txostenak gatazka mailakatu bat dagoela ondorioztatu zuen”.
ELAtik zehaztu dutenez, 2023ko maiatzean, Lan Ikuskaritzak errekerimendua egin zion udalari, gatazkari buruzko prebentzio-neurriak planifikatzeko eskatuz: “Baina 2024ko ekainera arte udala ez zen langilearekin bildu”.
Epaiak udalak arrisku psikosozialen arloan dituen prebentzio betebeharrak ez zituela bete onartu du, eta Ondarroako Udalaren egoera “pasiboa” izan dela ondorioztatu du, nahiz eta “iraupen luzeko gatazkaren eta langilearen egoeraren berri izan”. Lan Osasuna sustatzeko ELA sindikatuak sortutako Bidelagun fundazioak eraman du kasu honen zuzendaritza, eta “oso positibotzat» jo du epaia: «Administrazio publikoek langile publikoen arrisku psikosozialen prebentzioan duten erantzukizuna onartzen du”.
