Nahia Quincoces, Mendiko Eskiko Euskal Herriko Txapelketako irabazle
Zapatuan [otsailak 15] Izabako Bandres-Karolo Oroimenezkoak hartu zuen Euskal Herriko Txapelketa.
Lasterketa lehen hiru sailkatuakBandres-Karolo Oroimenezkoa Nahia Quincocesek behin baino gehiagotan irabazi du Izabako Bandres-Karolo Oroimenezko lasterketa, “ikaragarri” maite duen lasterketa da. Zapatuan [otsailak 15] ezin izan zuen garaipena errepikatu, baina bigarren postuagaz Mendiko Euskal Herriko Txapelketa irabazi zuen.
Elur baldintza zailei aurre egin behar izan diete parte hartu duten 200 eskiatzaileek. Gaueko izotzaren eraginez, “oso gogor” zegoen elurra, eta horrek ere zaildu egin du lasterketa. Erorikoak izan dira, larriena Igone Camposek izan zuen helikopteroak eraman behar izan zuen sorbalda atera ostean. Puntu baten antolakuntzak lasterketa moztu behar izan zuen eta guzti.
Hala ere, parte hartzaileek “ibilbide ikusgarria” nabarmendu dute. Emakumezkoetan, Marta Riba kataluniarra gailendu zen 2:38;56ko denboragaz eta hiru minutu eta hiru segundora ailegatu zen Quincoces. Uxue Fraile izan zen hirugarren ia hamar minutura. Gizonezkoetan lehia estuagoa izan zen. Borroka “ikusgarria” izan zuten Daniel Izquierdok, Asier Labairuk eta Ander de Miguelek, hiru minutu eskasetan heldu ziren hirurak. Labairua izendatu zen Euskal Herriko txapeldun.
Quincocesek zeuden elur aukerekin “ibilbidea zoragarria” izan zela nabarmendu du. “Ingurua, giroa, antolakuntza, dena, oso berezia da guretzat, eta aurten ere pila bat gozatu dut. Pena izan da Igoneren erorikoa. Lasterketa guztia horrekin arduratuta pasa dut. Mendian horrelakoak pasatzen dira; ea orain azkar osatzen den”.
