Lea Ibarreko Udal Mankomunazgoak hondakinen gaineko erabakiak hartu ditu
Lea Ibarreko Udal Mankomunazgoak etxez etxe banatutako galdetegia bete beharko dute herritarrek, etxe bakoitzak hondakinak nola bereiziko dituen jakiteko.
Europan lehenik, eta Euskal Autonomia Erkidegoan ondoren, hondakinen inguruan jaso diren legeek udalerrietako legeak orden berrira egokitzea ekarri du. Lege berrien arabera, 2030erako hondakinen %65 sailkatu beharko da, eta gaur egun, %50 inguruan dabiltza Lea Ibarreko biztanleak. Beraz, Mankomunazgoko Ingurumen Batzordean eztabaidatu ostean, ordenantza berdina aplikatuko da Lea Ibarreko 5 herrietan: Munitibar, Aulesti, Gizaburuaga, Amoroto eta Mendexa.
Ordenantza berriaren helburu nagusia, edukiontzi marroia (organikoarena) ondo kudeatzeko baldintzak sortzea izango da, eta txartelaren bidez zenbat alditan zabaltzen den kontrolatuko da, “ondo” edo “gaizki” nork egin duen jakiteko.
Organikoa sailkatzeko bi aukera jarri ditu mahaigainean Mankomunazgoak: “Batetik, etxean sortzen den organiko guztia etxeko konpostagailura botata edota etxeko animaliei jaten emanda, norberak bere organikoa kudeatuz, eta bestetik, etxean sortzen den organiko guztia edukiontzi marroira botata”.
Beraz, hondakinak bereizteko hartutako erabakiaren arabera, tasa desberdinak kobratuko dira etxe bakoitzeko, urtero. Etxeko animaliei edota etxeko konposta egiten duten kasuan, bi ezaugarrien arabera banatuko dituzte tasak: “Edukiontzietatik urrun dauden etxebizitzek (500 metro), 60 euro ordainduko dute urteko, 20 euroko hiru kuotatan banatuta, eta edukiontzietatik gertu dauden etxebizitzek, 90 euro ordainduko dute urtero, 30 euroko hiru kuotatan”. Edukiontzi marroira organikoa botatzen duten etxebizitzen kasuan, edukiontzietatik urrun dauden etxebizitzek 80 euro ordainduko dute urtero, 20 euroko lau kuotatan, eta gertu daudenek, 120 euro ordainduko dute, 30 euroko lau kuotatan. Hala, organikoa bereizten ez duten etxebizitzek 160 euro ordainduko dute hondakinen tasengatik urtero.
Lea Ibarreko Mankomunazgoak adierazi duenez, etxean konposta egiten duten bizilagunei nahiz janaria animaliei ematen dietenei, gutxienez urtean behineko jarraipena egingo zaie. “Edukiontzi marroiaren eta hauen erabiltzaileen jarraipena ere egingo da, gutxienez hilean behin”. Etxe bakoitzak hondakinak nola bereziko dituen jakiteko etxez etxe banatutako galdetegia bete beharko dute herritarrek.
