Lekeitioko etxebizitza diagnostikoa aurkeztuko dute eguenean
18:30ean kultur etxeko Azkue aretoan izango da aurkezpena. Herriko egungo egoera aurkezteaz gain, etorkizuneko erronkak zeintzuk diren ere azalduko dituzte.
Herriko etxebizitza egoeraren jakitun, Lekeitioko Udalak azterlan zehatza egiteko eskatu zion Gislan Geographic Applications Kooperatiba Elkarteari. Behin azterketa eginda, ateratako ondorio eta erronkak herritarrei aurkezteko ordua heldu zaie. Hala, bihar [otsailak 20] egingo dute diagnostikoaren aurkezpena, 18:30ean, kultur etxeko Azkue aretoan.
Bost puntu nagusi aurkeztuko dituzte bihar: demografiaren joera kezkagarria, bizikidetza unitateen garapena eta gazteen emantzipazioa, etxebizitza parkearen erronkak, etorkizuneko joera eta erronkak datozen 15 urteetan eta aurrera begira dituzte erronkak.
Demografiaren joerari dagokionez, “kezkagarria” dela adierazi dute. Izan ere, Lekeitioko biztanleria beherantz doa, zahartze tasa gorantz eta jaiotza tasa, ostera, beherantz, eta 20-34 urte bitartekoen multzoa txikitzen doa. Era berean azken urteetako migrazio saldo positiboak herriko biztanleriaren egitura aldatu duela ere adierazi dute.
Gaineratu dutenez, bizikidetza unitateen tamaina gero eta txikiagoa da: “Lekeitioko bizikidetza unitateen kopurua handitu egin da, baina bakoitzean pertsona gutxiago bizi da”. Ildo beretik, gazteen emantzipazioa ere “gero eta zailagoa” dela ondorioztatu dute, bi faktoreren eraginez alokairuen kostu altua eta etxebizitzen eskaintza eskasa.
Bestalde, etxebizitza hutsen tasa “oso altua” dela ere azaldu dute: “Lekeitioko etxebizitza parkeko %60,1 dira etxebizitza nagusiak eta %39,9k gainerako erabilera dute (bigarren etxebizitzak, pisu turistikoak…) edo hutsik daude. Etxebizitzetatik 2.000 ingurutan pertsona bat edo bi bakarrik bizi dira”.
Etorkizuna, zalantzan. Hurrengo 15 urteei begira ipinita, biztanleria asko zahartuko dela eta gazteak gutxitu egingo direla ondorioztatu dute. Izan ere, Lekeitiok %2,2 inguruko biztanleria galera jasango duela aurreikusi dute. Biztanleriaren zahartzearen aurrean “gazteentzako etxebizitza politika eraginkorrak garatzea lehenentasunezkoa” izango dela adierazi dute.
Halaber, datozen hilabeteetan udalak bi alderditan ipiniko du fokua: etxebizitza turistikoak mugartzeko HAPOn aldaketa puntuala egitea eta etxe jabeei ezagutaraztea etxea alokairu publikoan ipintzeko dauzkaten aukerak zeintzuk diren.
