Lekeitioko Portuko Udal Kontseilua eratu dute
Atzo [otsailak 18] egin zuten lehenengo bilera. Hainbat gai aztertu zituzten, besteak beste, berriki indartutako kanpoko dikea.
Lekeitioko Portuko Udal KontseiluaIrekia Lekeitioko Portuko Udal Kontseilua eratu zuten atzo [otsailak 18] Eusko Jaurlaritzak, Lekeitioko Udalak, Arrantzaleen Kofradiak eta bertako Amarratzaileen elkarteak. Lankidetzarako foroa izango da sortu berri dutena.
Bileran egon ziren Ander Aldazabal Lekeitioko alkateagaz batera Koldo Goitia Eusko Jaurlaritzako Itsasertzaren Garapenerako, Portuetako eta Itsas Gaietako zuzendaria, Ixone Soroa Arrantza eta Akuikultura zuzendaria, Edurne Egaña Euskal Kirol Portuko zuzendaria, Kofradiako ordezkariak eta Leakai aisialdiko nautikaren erabiltzaileen elkartea. Izan ere, Lekeitioko portuari arrantzaren berezko erabilera emateaz gain, aisialdiko nautika egitea ere ahalbidetzen du.
Lehenengo bileran, besteak beste, berriki indartutako kanpoko dikea, portura iristeko kanalaren urteko dragatze lanak eta Euskal Kirol Portuaren aisialdiko nautikarako instalatutako gasolina hornigailua aztertu dituzte. Era berean, Goitiak adierazi zuenez, kontseiluak udalaren proposamenak ere entzungo ditu, “portuak udalerriaren eta inguruaren beharrei erantzungo diela bermatzeko, eta modu horretan, itsasertzaren garapenean laguntzeko”.
